PM Modi-i akhüm maket o jembiogo: Manish Tiwari

Guwahati, March 28 (Agencies): Ato kilonser, Narendra Modi-i Assam Chief Minister, Tarun Gogoi arishi nung kanga tain akümba indang jembiba oji khenyongi akhüm maket, ta Hombarnü Congress-i aitsüogo.
Tanü Guwahati nung osangbenertem den jembidang Congress otongdar, Manish Tiwari-i, “Ato kilonseri akhüm kanga maketba o jembiogo. Gogoi ji Assam nüburtemi Chief Minister kümdaktsü, Modi-i kümdaktsü masü. Gogoi CM kümdaktsütsü mesüra mekümdaktsütsü obendang agütsütsüsa paji (Modi) shiba (?)” ta ashi.
Honibarnü election nüboyim sentong ka nung jembidang Ato kilonser Modi-i Assam CM Gogoi arishi küm dak sentakba nung, “Gogoi, küm ishika tsüngda na arishi küm 90 ajungtsü. Na kü dang tambu. Ni nü den tokteptsü atema masü saka akhüm agütsütsü atema ni Assam-i aru,” ta jembia liasü.
Taruba Assembly election atema affidavit nung Gogoi-i pa arishi küm 79 shi ta inoka lir.
Tiwari-isa, “Tangar mesüzüktettsüsa jembiba aser tajemtakdak maliba o jembiba dak alaka Ato kilonseri jembitsü kecha mali. Tesüiba ita 22 tsüngda pai Assam dang nangzükba kecha inyaka mali,” ta ashi.
“Assam yimtenren aser rongsenkettsüng jenjang raksabaji BJP khuret asütsü, Assam nüburtemi telemtetba tai agira tsüngremi tai tokangma,” ta paisa shisem.
Tiwari-isa, “Tesüiba ita 22 apir (Centre yimsüsüba) ni Assam nüburtem dang Congress sorkar pezübenbuba arutsü atema vote agüjang ta mepishir,” ta ayimoktsü.