PM Modi-i anogo ananü Kerala semdanger; PM sentong nung Kerala CM mejaok

Kochi, December 14 (Agencies): Ato kilonser Narendra Modi-i anogo ananü Kerala state semdanga tanü IAF tayimtsü ka nung pa Kochi tonga aruogo.
Modi leniba nung züngsem 35 tashi aruogo. Union Defence minister Manohar Parikkar-a tang Kochi nung lir.
Tanü Modi Naval airport tonga aruba mapang state Angh P Sathasivam, Chief minister Oommen Chandy, fishery minister K Babu, Kochi Mayor, Soumini Jain, Ernakulam K V Thomas, MLA Hibi Eden, chief secretary Jiji Thomson aser Cardinal, Mar George Alencherry nungeri pa agizüka liasü.
Pa yang nungjagi helicopter ka nung Thrissur-i aotsü aser yangji lokti senden ka nung adentsü. Iba sülen Modi gari ajanga Kochi-i arutsü aser Mongolbar nü INS Vikramaditya nung Joint chief Conference pa leniba nung agitsü.
Mongolbar nü Kollam nung Sree Narayana Dharma Paripalana Yogam (SNDP)-i ayongzükba sentong ka nung Modi-i taoba mapang state chief minister, R Shankar indang kürakyanglu ka sayatsütsü, iba sentong nung adentsü atema Kerala chief minister Chandy bo mejaok, ajisüaka tanü Modi airport atongba mapang Chandy-i pa agizükogo.
Iba dak sentakba nung Hombar nü Chandy-i sangdong ka ajanga, SNDP Convenor, Vellappally Natesan-i mepishiba nung ajemdaker pa iba sentong nung madentsü, aser ibaji ajanga pa kanga mepelar, ta shiogo.
Chandy-isa, Ato kilonser sentong nungji pa adentsüla, iba dak alia Sankar ya taoba Chief minister aser Kerala Pradesh Congress Committee tongti liasü anungji pa-a iba sentong nung adentsüla, ajisüaka sentong ayongertemi mepiba nung ajemdaker pa iba sentong nung madentsü lemtet, ta ashi.