PM Modi-i anogoshia langa tasen menangzüktsüla: Nitish Kumar

Patna, Sept 01 (Agencies): Tanü Bihar Chief Minister Nitish Kumar-i, 2014 Lok Sabha election mapang Ato kilonseri nangzüka alibatem mataloktsü, aser state sorkar indang scheme tejentem sayaba ajanga Bihar nüburtem anisar, ta aitsüogo.

Twitter ajanga Bihar Chief Minister-i Ato kilonser Narendra Modi dang “mesüzükba o jembiba aser teku tsüngshiba anenang” aser 2014 Lok Sabha election nung nüburtem dang nangzükba atalokjang, ta ashi.

“Mapa agi sayuang. Taoba mapang nangzükbatem nung tamakok anguba nangzükang,” ta Janata Dal-United lenir Kumar-i ashi.

“Tenangzükba meinyakba aser nü o ajanga jashitaktsüba Bihar nüburtem melungsentsü akhümtsübuang,” ta pai ashi.

Modi dang tamalen pai jembiba o tamajungtem meyipa agiang ta shia Kumar-i, “Bihar nem maongka balaka agütsütsü ta nai nangzükba ama inyakang. Senotsü teyari sangdongba ajanga nüburtem manisatsüla, iba nungji shilem 86 bo tejen scheme tem indang lir,” ta ashi.

“2014 election mapang nangzükba inyakang aser temzüng alema aibelen ken o alir candidate tem nem ticket (party ticket) magütsütsü ta sangdongang,” ta Kumar-i twitter ajangasa ashi.

Ato kilonseri Bihar atema sen lakh crore 1.25 nangzükba den toktepa Hokolbar nü Kumar-i taruba küm pongu nung terenlok mapa atema sen lakh crore 2.70 nangzükogo. Item terenlok mapatem rongnung light angati tsükdaktsütsü aser kibong shia nung tzü connection densema alir.

Chief minister-isa, mapa mengui alir arishi küm 20-25 tsüngdapur mapa bushidang intoktsü atema ita teko asoshi ita shia anaben sen 1,000 agütsütsü, ta ashi.

Class 12 pass asür kaketshir nem credit card agütsütsü, aser ibaji ajanga bank mashi ka nungi sen lakh 4 loan agitettsü. Iba credit card nungi loan agiba sen temlok shilem 3 ji state sorkari agütsütsü, ta Kumar-i ashi.

Taruba küm pongu nung lanurtem atema senotsü crore 49,800 shi intoktsütsü, ta paisa ashi.

Tesürtem dak sentakba nung pai, state nung mapa shilem 35 bo tetsürtem nem wazüka toktsütsü, ta ashi.

Tang state nung constable nungi Inspector level tashi nung police mapa shilem 35 tetsürtem nem wazüka agütsüdar, ta paisa ashi.