PM Modi-i APJ Abdul Kalam Technical University lapoktsü ; Tanü Lucknow nung International Yoga day nung adentsü

Lucknow, June 20 (Agencies): Mongulbar anüngdang Prime Minister Narendra Modi-i Lucknow tonga aruba sülen Dr APJ Abdul Kalam Technical University lapoktsü.
“Defense aser security nung asenoki shinga teyari magii otettsü mangdang nung asenok tejakleni aoer” ta tanü Modi-i ashi.
India-i satellite 104 apusoa yokdang alimai asenok meteta aküm. Asenok dak tashi lir aser tejaleni otettsü, ta paisa shisem.
Tanü Modi-i Uttar Pradesh yimtiba tonga arudang UP CM Yogi Adityanath aser minister temi tayimtsü anendak pa pela agizük.
Pa tonga aruba sülen Prime Minister-i Central Drug Research Institute (CDRI) indang campus tasen lapoktsü.
Iba sülen pai, Dr APJ Abdul Kalam Technical University indang ki tasen lapoktsü.
Iba sentong nung Modi-i Pradhan Mantri Awas Yojna kübok nisung 20 nem ‘allotment letters’ agütsü. Paisa Lucknow aser Kanpur tsüngda 400 KV transmission line lapoktsü.
Bodbarnü Prime Minister Modi-i Ramabai Ambedkar Ground nung nisung 60,000 den International Yoga Day amungtsü.
Asüngnep 6:20 ako meta nungi minute 80 yoga session tenzüktsü aser iba nung yimten yimsüsürtem, ketdangsertem aser mongin nisungtem aikati shilem agitsü.
Prime Minister-i anogo ananü Lucknow semdangba atema security kanga akangshiogo. Police den Provincial Armed Constabulary (PAC) company 25 tashi mapa lemzükja lir.
Yimti nung CCTV camera 400 shi enokogo aser tesem balala nung drone camera tem amshir.
Asüngnep agitsüba sentong nung Prime Minister Modi, Angh Ram Naik, Chief Minister Yogi Adityanath aser Deputy Chief Minister Keshaw Prasad Maurya nungertemi yoga aitsü.
Ramabai Ambedkar ground nung LED TV tem enokogo aser iba yoga session ya live sayutsü.