PM Modi-i Army aser ITBP sepaitem den Diwali among

New Delhi, Yimpoksüi/November 07 (Agencies): Tanü Ato kilonser, Narendra Modi-i Army aser Indo-Tibetan Border Police (ITBP) sepaitem den külemi Diwali benjung among.
Item sepaitemi China-India arrtsü kilometer 3,488 anüker.
Tanep 7:50 ako meta Ato kilonser Uttarakhand state kübok aliba Harshil yim atong aser sepaitem nem nanglong lemtsüba sülen 9:10 ako meta Kedarnath-i ao, ta ITBP otongdar kati metetdaktsü.
Harshil ya Jalandhari Gadh aser Bhagirathi ayongtem anasa lir aser Baspa Valley tenemtsüng kübok lir.
Iba anogomong nung Modi-i, pai Kailash Mansarovar Yatra aoba bilemteter aser temeshi aieni aoba mapang nung ITBP sepaitemi pa den tamang aieni aoertem yariba pai bilemteter, ta metetdaktsü.
Tesülen Modi-i Kedarnath tekülem kidang sarasadem aser India-China arrtsü anüker sepaitem den Diwali salem lemsatep.
Sarasademba sülen Modi-i yangji aliba nüburtem aser Lord Shiva tekülem kidang adenshia alirtem ajurua liasü.
Sepaitem den Diwali benjung salem lemsatepa Ato kilonser Modi-i, rürjep aliba tenem nung pei wadang junga tenzükba ajanga linük nem tashi agütsür aser India nunger nütsüng crore 125 tarutsü tia kümzüka ayur, ta ashi. 2014 küm nunga Ato kilonser Modi-i Siachen nung sepaitem den külemi Diwali benjung monga liasü. Maneni 2015 küm pai Punjab arrtsü semdanga sepaitem den Diwali benjung monga liasü.
2016 küm Modi-i Himachal Pradesh semdanga Indo-Tibetan Border Police den Diwali monga liasü aser yaküm pai Jammu & Kashmir kübok Gurez nung sepaitem den külemi Diwali among.