PM Modi-i Asia nung mezüngbuba cross-border petroleum pipeline lapoktsüogo

New Delhi, Rongjui/September 10 (Agencies): Ato Kilonser Narendra Modi-i Mongolbarnü Asia nung mezüngbuba India aser Nepal na tsüngda cross-border petroleum pipeline lapoktsüogo. Pai ashiba agi, Motihari-Amlekhganj pipeline ya linük ana tsüngda tesendaktep tajung aliba temaitsü ka lir.
Sen billion 3.5 indoka yangluba oil pipeline project ya 1996 küm mezüng benok aser PM Modi-i 2014 küm Nepal semdangba sülen asendenshir takaratiba nung inyakyonga ao. Modi aser Nepal premier KP Sharma Oli na longjemer Oil-i India semdangba mapang taoba küm New Delhi, Hyderabad House nung iba project nüngshilong azüngja liasü.
“South Asia nung mezüngbuba cross-border petroleum pipeline otsüsütsüsa kanga kara tembangtetba atema kanga temulung süa bilemer. Iba mapa ya imlaa aliba dang nungi mapang tesadang agi takaraba tembangogo,” ta Modi-i ashi. Paisa, iba sentong takok ngua inyaktetba atema Nepal nung lenirtem nem tenüngsang agütsütsüla ta ashiba den Nepal sorkar teyari nung aser linük ana senteper iba mapang kanga takok ngua inyaktetogo, ta ashi.
PM Modi-isa Himalaya tementsüng nung aliba linük terenlok asoshi India-i bendanga agüja inyaktsü mulungteter lir ta ashi. “2015 küm menoknok kanga tesashi arua teraksatsüba tulu bener arutsüba sülen Nepal yanglushitsüsa aküm aser India-i kidanger aser tembar ka ama teyari agütsüogo. Linük ana külemi longjemer inyakba ajanga Nepal kübok Gorkha aser Nuwakot districts nung ki tem tanaben yangluogo aser iba atema kanga pelaa bilemer,” ta pai ashi.
Motihari-Amlekhganj pipeline ya taküm April ita tom nungi amshi tenzüktsü imlaa liasü saka Nepal kübok Parsa National Park nung süngtong leptoktsü asoshi temelaba meshitsü aliba ajanga menodaktsü.