PM Modi-i Assam aser Arunachal semdangtsü

Guwahati, February 1 (Agencies): Northeast nung aser talisa Assam nung BJP-i aniba NDA sorkar indang Citizenship (Amendment) Bill, 2016 anema lungkak aitba mapang ka nung Prime Minister Narendra Modi-i ano Assam semdangtsü ama osang angazüker.
Prime Minister Modi-i February 9 nü Assam aser Arunachal Pradesh semdangtsü.
Assam kübok Morigaon nung Modi-i Srimanta Sankardev Sangha session nung adentsü ama lir.
Pai northeast kübok state 7 nungi BJP lennirtem den ajurutepa senden amentsü imlar. Iba senden nung taruba Parliamentary election atema sentong atongtsü, ta party osang ka ajanga ashi.
Lok Sabha nung agizükba CAB ajanga northeast nung tensa mesüngjemteti lir aser nübortemi BJP anema noktaker. Iba ama mapang ka nung PM Modi-i northeast semdangtsübaji tongtipang ama züngshir.
Kasa anogo nung Prime Minister-i Arunachal Pradesh kübok Papum Pare district nung greenfield airport yanglutsü atema lung azüngtsütsü.
Iba ya Arunachal Pradesh nung mezüngbuba airport lir aser ali hectare 320 nung Airports Authority of India (AAI)-i yanglutsü.
Iba airport renemba sülen mezüng atema Airbus A321 ama tayimtsütem anentsü akok. Iba mapatong nung five-star hotel ka aser convention centre ka yanglutsü densema lir.