PM Modi-i Assam semdangtsü atema sentong tulu renemdar

Guwahati, May 22 (Agencies): BJP-i aniba NDA sorkar küm asem abensaba anogo, May 26 nü Guwahati nung aliba Khanapara Veterinary ground nung Ato kilonser, Narendra Modi-i lokti senden tuluka nung jembitsü sentong renemdar.
Yaküma kasa tesem nung Sarbananda Sonowal Assam Chief Minister atema tenangzükba agiba mapang nunga Ato kilonseri jembia liasü.
Hokolbarnü lokti senden nung nisung 1,50,000 adentsü südi, ta BJP-i metetdaktsüogo.
BJP general secretary, Dilip Saikia-i, “Hokolbarnü sentong ya akhümket sentong ka asütsü. Iba sentong takok angutsü atema onoki inyakdar. Iba sentong nung nisung lakh ka ser tesadangbosa adentsü nükjidong lir, ajisüaka iba dak tali arua adentsü atema onoki inyakdar,” ta metetdaktsü.
Deobarnü state BJP Tir, Ranjit Kumar Das-i state nung district ajak nungi BJP lenirtem den videoconference senden ka mena liasü, aser iba senden nung Modi-i state semdangtsü aliba onük tongti süa jembi.
Yaküm May 24 nü kasa tesem nung jembiba sentong nung nisung lakh 2 jungnüa adenshia liasü.
Hokolbarnü Ato kilonser, Modi-i Tinsukia dictrict kübok Sadiya nung, Asia nung apu talangtiba semzüktsütsü, Changsari nung AIIMS centre semzüktsütsü aser Dhemaji district kübok Gogamukh nung Indian Council of Agricultural Research amenoktsü atema lung azünga yutsütsü.