PM Modi-i August 17 nungi anogo ananü Bhutan semdangtsü

New Delhi, August 09 (Agencies): August 17 nü Ato kilonser, Narendra Modi, Bhutan linüki apusoa aotsü aser anogo ana tsüngda pai Bhutan lenirtem den linük ana tesendaktep tashi itshitsü atema jembitsü, ta tanü Ministry of External Affairs (MEA)-i sangdong ka ajanga metetdaktsü.
India-i tamang katetba tembar linük Modi-i semdangba ajanga India-i kidanger linük den tesendaktep tajung yunüba kuli sayur, ta MEA sangdong nung shia lir.
2014 küm Ato kilonser akümba sülen-a Modi-i Bhutan linük tama semdanga liasü.
“Ato kilonser Modi-i kümsük tanabuba tenzüker mapang tatsüka tsüngda Bhutan semdangba ya India sorkar indang ‘Neighbourhood First Policy’ den sendaktepa lir,” ta MEA-isa metetdaktsü.
Iba mapang nung Modi-i Bhutan Ato kilonser, Lotay Tshering den senden amentsü aser King of Bhutan, Jigme Khesar Namgyel Wangchuck-a ajurutsü imlar.
Bhutan ya India nunger asalentong nung tesendaktep aliba linük ka lir, aser tesüiba küm ishika tsüngda linük ana tesendaktep kanga junga kümogo. External Affairs Minister, S Jaishankar-ia June ita nung Bhutan semdanga liasü.
Modi-i Bhutan semdangba mapang nung linük anati rongsenkettsüng, terenlok nung amalitep, hydropower nung amalitep aser nübur tsüngda tesendaktep jenjang yanglushitsü atema jembitsü, ta MEA-i metetdaktsü.
Senden amendang Modi aser Tshering nati linük ana dak sendakba onük dang masü saka regional onüktem nunga o lemteptsü.