PM Modi-i Backward class nungi MP 40 ajuru

New Delhi, July 03 (Agencies): Bodhbarnü New Delhi nung Ato kilonser, Narendra Modi-i pa indang office nung other backward classes (OBC) nungi BJP MP 40 dak tema ajuruogo, ta osang ka ajanga metetdaktsü.
Tang mezüng 7 Lok Kalyan Marg nung Modi-i OBC nungi BJP MP tem ajurua senden amener, tang tetenzüker ser ano mapang shia iba ama senden amentsü.
Brihostibarnüsa Modi-i scheduled castes nungi MP tem ajurua senden amentsü.
Tanü senden nung kechisa jembiar mejangjar, ajisüaka BJP MP kati, “Modi-i onok den tatsüka o lemtep aser MP temi tejak shiotep,” ta metetdaktsü.
Iba senden nung MP 43 den Parliamentary Affairs Minister, Pralhad Joshi-a densema liasü.
BJP MP tem ya shilem tenet küma lemsar lir aser item shilem rongnung- tanubor MP tem telok ka, tetsür MP tem telok ka, scheduled castes nungi MP telok ka aser other backward classes nungi MP telok ka densema lir aser Modi-i item telok ajak jurila ajurutsü.
Taoba 16buba Lok Sabha nunga Modi-i state balala nungi BJP MP tem ajurua sorkar tongtibang onüktem nung o lemtepa liasü.