Patna, October 26 (Agencies): Linük nung menjang jenjang tali atuba atema Ato kilonser Narendra Mdoi aija tanü Congress tatong Tir Rahul Gandhi-i, menjang nung jenjang tali atuba ajanga sensakertemi alia mechitetba mapang pai (Modi) bendanglen indang menjang achir, ta ashi.
Bihar assembly election atema East Champaran district (Bihar), Areraj nung nüboyim sentong ka nung jembidang Rahul-i, “Menjang nung jenjang tali atuba ajanga nüburtemi kanga sapuba ‘dal’ mechitettsüsa kümogo, ajisüaka Modi bo bendanglen indang menjang (videshi dal) achir. Menjang seret ka nung sen 200 tura sensakertemi kodaser ibaji alia chitettsü(?). Ibaji parnoki matutsü,” ta ashi.
Gandhi-i nüburtem dang, nüngdakba osettsüset/chiyungtsütem nung jenjang ajema kümtsütsü ta Ato kilonseri nangzüka liasü, ta ashi.
“Dal seret ka nung sen 70 agi ayokba mapang pai onok (Congress sorkar) aija ibaji jenjang kanga saker ta aitsü, saka tangbo pai ola madoker. Pai ‘na khaaonga na khaane doonga’ yimyim nung jembibaji pai dal indang jembir liasü ta ni memeteti liasü,” ta Congress leniri ashi.
Maneni Ato kilonser aija Rahul-i, “BJP indang mapatong ‘Make in India’ indang keyi (Modi) ajanga linük nung shinga nem-a mapa magütsütet. Pai adenshia aliba lanurtem dang, nenok mapa ngur asü ta asüngdangba mapang parnoki masü, ta ola tulu adoka langzü,” ta ashi.
Rahul-isa, Modi-i bendanglen nungi ochimashiba sen meyipa bener arutsü nangzük, ajisüaka pai ibaji meinyaktet masü no (?) Pai nangzükba ama nenok karbo nenok bank account nung iba senji aiter ma (?),” ta asüngdang.
“Iba ya RSS-i agütsüba training ka ta ni meteta lir, ajisüaka yazü jembiba anener mapa inyaktsü ni nü (Modi) mepishir,” ta paisa ashi.
Modi-i bendang linüktem semdangba dak sentakba nung Gandhi-i, pa bendang linüktem dang sema senzüra kodaser pai linük onüktem atema inyaktetttsü, ta ashi.
“Ato kilonseri sentsü tesangwa semer alima sema senzür, ajisüaka linük nung sensaker aser Dalit nübur semdangtsü atemabo pai mapang mangur,” ta paisa ashi.
You must be logged in to post a comment Login