PM Modi-i bendanglen India maksütsüba anentsüla: Shiv Sena

Mumbai, June 08 (Agencies): Bodhbarnü Shiv Sena-i Ato kilonser, Narendra Modi dang lokti nung jembidang India nung ochimashi aliba indang jembiba ajanga “bendang linüktem nung India maksütsüba anentsüla,” ta ashi.

Ato kilonser Modi-i bendang linük balala sema senzüdang India nung ochimashi aliba indang jembiba atema kanga ashishia Shiv Sena-i, iba ya ajanga tarutsü nung linük jenjang majungtsü, ta ashi.

Sena-i parnok osangkaket Saamana yimobilem ajanga, “Doha nung lokti nung jembidang Ato kilonseri India nung ochimashi aliba aser itemji bentettsü atema pai mera agibatem indang jembia liasü. Sentepa alirtemi teka maa pa o pelaa agizük. Iba ya tanga kecha masü, saka bendanglen linük noksa tamajung sayuba lir,” ta ashi.

Linük nung BJP-i aniba sorkar aruba sülen küm ana nung ochimashi indang jembiba lira ibaji shirnok tai ajanga, ta Sena-isa ashi.

BJP aitsüba olen ka nung Sena-i, “Ochimashiji (BJP-i yimsüsüba state tem) Gujarat, Maharashtra aser Madhya Pradesh nunga adokdagi- iba atemaji-a maneni Gandhi’er kibongsa aitsütsü asü (?)” ta asüngdang.

“Ato kilonseri tajungba meteta lir. Pa linük tejak aser alimai pa dak tamang akar. Ajisüaka bendanglen pai jembiba otemji alimai tai rateta agitsüa akok aser ibaji ajanga asen rongsenkettsüng jenjang nung kongshitsü,” ta Sena-i tekümdangtsü olen ka ashi.

Ato kilonser Modi aija parnoki pa dang, linük telung nungbo ochimashi aijang aser iba atemaji inyakang ta ashi.

“Gandhi kibong aser Robert Vadra ochimashi indang aika jembiogo. Tangbo parnok nem temerenshi agütsütsüla. Europe aser America-i oa iba indangji jembitsü nüngdak madoker,” ta parnoki ashi.

“Linük ka ama asenok ajak longjema lir, aser yimtenren nung asenok tangatetba balala liaka asenok ajak ya kibong ka mesük, aser iba noksaji alima matsüngdang sayutsüla,” ta SS-isa ashi.

Tawa Modi-i Switzerland semdangang par linük bank tem nung India nunger account alir tenüng meshiba dak sentakba nung Sena-i, “iba ya ajanga bendanglen linük noksa tamajung sayur,” ta ashi.

“Swiss nunger rongsenkettsüng atema parnoki alima ajaklen nungi sen rizünger aser parnoki black money indang osang kodanga jungkai madoktsütsü,” ta Sena-i ashi.

“Modi-i bendang linük bank tem nung miima aliba sen meyipa bener arur India senso shia nem sen lakh 15 agütsütsü nangzük. Iba ya shisa kaa inyaktsüla,” ta parnokisa shisem.