PM Modi-i Bihar semdangbaji temaitsü tamajung: Lalu Prasad

Patna, September 12 (Agencies): Rashtriya Janata Dal (RJD) tongti lenir Lalu Prasad-i, taoba ita Ato kilonser Narendra Modi-i Bihar semdangba sülen Bihar nung tzünglu kanga ajema arur, ta aija jembiogo.
“Modi-I Bihar semdangba tu atakatem ka liasü. Modi tetsüng ji tia makaba temaitsü. Modi-i state semdangba sülen Bihar nung tzünglu marur. Aluyimer million aika shisabuludagi,” ta Patna nung news channel kati ayongzükba sentong nung Lalu-i ashi.
Local weather ketdanger A.K. Sen-i, Bihar nung tzünglu shilem 22 dak tema ajema aruogo aser September tasembuba hopta nungbo ano timba akümtsüa akok, ta metetdaktsüogo.
Modi-i tesüiba ita ana tsüngda Bihar ponguben semdangogo. Pai BJP ‘parivartan’ rally pezü nung jembiogo aser tan ita Bodh Gaya semdanga liasü.
Lalu-isa, Modi-i nüburtem dang nangzüka aliba kata meinyaktsü, ta ashi.
“Nüburtemi black money ken o ya osettsüset nung jenjang atuba den sentakteptsüogo, ajisüaka pai ola madoker,” ta RJD tongti leniri ashi.
Lalu-isa, BJP-i kin nung ajemdaker yimtenren mapa inyaker, ta aitsü.
“BJP-i Rajput nütsüng aika aliba tesem nung Chief minister canditate atema Rajput caste lenir aser union Minister Radha Mohan Singh shim aser Bhumihars nütsüng aika aliba yimtsüngtem nung Bhumihar lenir aser taoba union minister C.P. Thakur toktepdaktsür,” ta RJP tongti lenir aser taoba mapang Bihar chief minister Lalu-i ashi.
Lalu-isa, Bihar assembly election atema RJD aser Nitish Kumar’er party JD-U melongjem asübo taoba Lok Sabha election nung ama BJP-i aniba NDA-i state nung takok tulu ngula, ta ashi.
“Nitish Kumar ya keno lir, onok pa den lir. BJP-i Yadav kin nung telemsa adokdaktsütsü kanga meranger. Ajisüka Yadav nübur telemsa madoktsü,” ta paisa ashi.