PM Modi-i Bose, Jallianwala Bagh museums semzüktsüogo

New Delhi, January 23 (Agencies): Tanü Red Fort nung Ato kilonser, Narendra Modi-i Subhash Chandra Bose museum semzüktsüogo; Bose sor küm 122 ajungba nüngtem nung iba museum semzükogo.
Ato kilonser, Modi-isa Yaad-e-Jallian Museum (Jallianwala Bagh aser World War I museum), 1857- küm India nungeri mezüngbuba nüchiso atema raraba museum aser Drishyakala-Museum on Indian Art semzüktsü.
Red Fort complex nung aliba museums ajak dangji ‘Kranti Mandir’ ta ajatsü, aser iba ya nüchiso atema rarartem nem tetushi agutsüba temaitsü asütsü, ta Modi-i twitter ajanga metetdaktsü.
Bose aser Indian National Army museums nungji Netaji aser INA dak sendakba nüngshi osettem sayatsü aser item rongnung Bose-i amshiba menden den noklangnok, medals, badges, uniforms aser INA dak sendakba nüngshi osettem lir. Ano documentary ka ajanga museums semdangertemi Bose aser INA indang taliba metettsü. Actor Abhishek Bachchan indang ola-a documentary nungji amshia lir.
Yaad-e-Jallian Museum nungji April 13, 1919 nü atalokba Jallianwala Bagh indang tejangja shia lir.
Iba museum ajanga World War-I mapang nung India nunger sepaitemi tenla agütsüba aser tasü itta raraba sayatsü.
Ano Sarojini Naidu-i World War I mapang nung India nungeri British yimli atema raratsüba indang sangro ka züluba museum nungji yua lir. ‘The Gift’ ta ajaba sangro jagi First World War mapang nung India nunger sepai million 1.5-i tenla agutsüba indang shia lir.
Drishyakala- Exhibition on Indian Art ajanga Aso 16buba nungi India nunger nüchiso anguba mapang tashi indang art sayatsü. Item rongnnung Amrita Shergil aser Raja Ravi Varma na indang arts densema lir.