PM Modi-i British MP tem dang kiralongraba anema ola adoktsü ayongzüker

February 14, 2017 nü New Delhi nung British nung Parliament züngsem 8 telok kati Prime Minister, Narendra Modi den ajurutepdang agiba noksa angur. 

New Delhi, February 14 (Agencies) : UK Parliament nung Kashmir indang onük benoka jembir ita ka shi lir, Prime Minister Narendra Modi-i British MP tem dang kiralongraba aser tali bilemloka oa inyaksangshiba indang osang metetdaktsü aser item khuret atema ola adoktsü ayongzük.
British Parliament nungi züngsem 8-i akümba telok ka den ajurutepdang, Modi-i India aser UK naji alima nung kiralongraba anema raraba nung teyaritepertem lir ta ashi.
Paisa, British Parliamentarians dang kiralongraba, tali bilemloka oa inyaksangshiba aser tesayuba tai sayubatem atema maneni ola adoktsü ayongzük, ta PMO sangdong ka nung metetdaktsü.
January 20 nü UK Parliament nung Kashmir nung ozüng alema mapa inyakba aser meimchir temeten anema inyakba onüktem benoka telatetba ka agi. Iba dak rangloker Modi-i UK nungi Parliament züngsemtem ayongzük.
“British sorkari Pakistan aser India na dang yimjung maparen inyaktsü aser UN Security Council telatetbatem nung aliba den liromedema Kashmir nunger nem temeten agüja Kashmir ketdangsüa aotsüla” ta British Parliament-i telemtetba ka agi.
Pakistan aser parnoki agia aliba tesemtem nungi arrtsü adena kiralongraba mapa inyaker ta India-i aitsür. Iba nung ajemdaker Kashmir onük atema telemtetba magidaktsür aser linük ana tsüngda olemtep sota lir.
India aser UK tsüngda tesentaktep alibaji linük anaprong nung züngsem aikati pusema nungiter, ta Prime Minister Modi-isa ashi.
Linük anaprong nungi Parliament züngsemtem tsüngda mapang shia ajurutepa sensaksemtsü atema paisa ayongzük.
UK nungi teshimtet telok den sensaksemdang Modi-i November 2015 nung UK semdangba aser ano yaküm November ita Prime Minister Theresa May-i India semdangba menungra bilemba metetdaktsü.
2017 küm India-UK Year of Culture amungba pelashishia agizüker, ta Modi-isa shisem.