PM Modi-i China defence minister den ajurutep

New Delhi, Luroi (August) 21 (Agencies): Yaküm Doklam nung tekong merangtepba sülen China Defence Minister General Wei Fenghe-i India semdangi arua lir aser pai tanü Prime Minister Narendra Modi den ajurutepa military o defence onüktem lemsatep.
India aser China tsüngda jenjang temaba nung ajurutepa tongtepratepba atema pelaba olen ka tanü Modi-i senden nung jembi.
“Linük ana tsüngda tesentaktep tajungba akümba ajanga alima tali süngjemtsü” ta Modi Wei dang ashi.
Taküm küm tetenzüklen Modi aser China President Xi Jinping tsüngda senden ka amenba sülen Wei-i anogo pezü atema India semdanger.
Wuhan nung Modi aser Xi na ajurutepa senden amenba ajanga linük ana tsüngda Doklam onük angatetteptsü atema aser tongtepratep den mitkartem tsüngda temulung lemteptsü indang maparen tenzük.
Tebilemba balala asübayong India aser China tsüngda tesentaktep nung mangatettep madokdaktsütsüla. Linük anaprongi arrtsülen tensa meraksaktsüla aser yimjung ayutsüla, ta Modi-i Wei dang ashi.
Wei-i asüng Defence Minister Nirmala Sitharaman den ajuruteptsü sentong lir. Lennir ana tan agi tanabenbuba ajuruteptsü. Taküm April ita Sitharaman-i Beijing semdangdang lai Wei den ajurutepa liasü.
Chinese PLA-i Doklam nung mapa inyaksangshitsü tenzükogo ta osang kar prokshiba mapang linük ana nung defence minister tem senden amentsü. Ajisüaka, Indian Army-i Doklam nung teti inyaka aruba ama dang mapa inyaksangshir ta shiogo.