PM Modi-i China den arrtsülen sepaitem den Diwali among

October 30, 2016 nü India-China arrtsülen Ato kilonser, Narendra Modi-i ITBP sepaitem den nanglong lemsatepa Diwali benjung amongba noksa nung angur.

Shimla (Himachal Pradesh), October 30 (Agencies): Deobarnü Ato kilonser, Narendra Modi-i Himachal Pradesh nung China den arrtsülen sepaitem den külemi Diwali benjung mongogo.
Jeli sentong nung meliaka Modi-i ajungbena Chango yim semdanga liasü.
Iba anogo nung Ato kilonseri Sumdoh nung Indo-Tibetan Border Police (ITBP) sepaitem, Dogra Scouts aser Army tem ajurua jembi.
Sumdoh ya Himachal Pradesh yimtiba, Shimla nungi kilometer 330 shi pilar Kinnaur aser Lahaul-Spiti districts arrtsülen lir.
Ketdangsertem osang ajanga ashiba agi, Ato kilonser tanü 11:00 ako meta atong aser Sumdoh o Chango na nung ghonda asem shi sepaitem den among.
Modi-i sepaitem nem nanglong lemtsü aser sepaitemia pa nem nanglong agütsü.
Modi den National Security Adviser, Ajit Doval aser army tongti, General Dalbir Singh Suhag nata liasü.
Sumdoh nung Ato kilonserisa Border Roads Organisation (BRO) wing, General Reserve Engineering Force (GREF) züngsemtem ajuruogo, ta ketdangser kati ashi.
Iba sülen Modi-i metoklashi (apple) tajung adokba tesem, Kinnaur district kübok Chango yim semdang.
Ajungbena Modi-i iba yim semdangba ajanga yimtaklirtemji süngmangtepa tepela tulu nung pa nem tenüngsang agüja yimyim ayima liasü. Iba sülen Modi-i tetsürtem aser tanurtem dena mapang tatsüka intoka kazü.
Osangbenertem den jembidang BJP MP, Ram Swaroop Sharma-i, “China den arrtsülen tezü nung aliba yimertemi Ato kilonser den amongbaji ostüsütsüka asütsü,  kechiyong tang mezüng Ato kilonser kati iba tesem semdanger, aser iba ya ajanga tesem nung terenlok alitsü,” ta ashi.
Modi-i tan ita tang agi tanaben Mandi parliamentary constituency semdanger. October 18 nüa pai Mandi jila nung hydropower projects asem semzükja liasü.
Modi Ato kilonser akumba sülen 2014 küm pai Siachen nung sepaitem den Diwali among aser 2015 küm pai Punjab nung India-Pakistan arrtsülen Diwali benjung monga liasü.