PM Modi-i chowkidar inyakner; saka chowkidar ji auer: Rahul

New Delhi, Rongjui/September 20 (Agencies): Ato kilonser Narendra Modi odiodia aija tanü Congress Party Tir, Rahul Gandhi-i Ato kilonserji auer, ta ashi.
Rajasthan, Dungarpur district kübok Sagwara nung lokti senden ka nung jembidang Rahul-i, Ato kilonseri ‘Chowkidar’ (tanüker) inyakner, ajisüaka ‘Chowkidar’ ji auer ta asenok ajaki metet, ta ashi.
Paisa, linük nübur ajaki linük atema ‘Chowkidar’ ji auer ta ola adoker, ta ashi.
Aluyimertemi Ato kilonser Narendra Modi dang parnok sentsüh atoktsü atema mepishir, ajisüaka pai aluyimertem timtem merepranger, ta shia Rahul-i, “Pai (Modi) industrialist 15 dang sen crore 1,50,000 toktetra kechiba pai aluyimertem dangbo sentsüh metokteter? Pa dang ibaji asüngdangra pai ola madoker,” ta ashi.
Ato kilonser Modi-i Anil Ambani (Reliance kibur) nem Rafale fighter jets alitsü atema contract agutsü, ta shia Rahul-i, “HAL (Hindustan Aeronautics Limited)-i küm 70 dak tema inyaka arur. Ato kilonser Modi aser Anil Ambani na France-i ao, aser HAL dang nungi iba (Rafale tayimtsü) contract auyar Reliance nem agutsü,” ta aitsü.
Paisa, Anil Ambani-i pa akumli piyong nung tayimtsü kata meyanglu, ajisüaka Ato kilonseri Defence Minister danga masüngdangi pa (Anil Ambani) nem iba contract agutsü, ta ashi.
“Congress party-i longjemer Rajasthan assembly election nung tokteptsü aser Rajasthan nung nüburtem timtem ajema kümdaktsütsü,” ta Rahul-i ashi.
Rahul-isa, Rajasthan Chief Minister Vasundhara Raje-i lar jabaso atema Lalit Modi dang nungi sen agir, ta aitsü.
“Rajasthan Chief Minister indang business partner Lalit Modi-i lar jabaso nem sen agutsü, BJP sorkari item ama nisungtem atema inyaktsür,” ta pai aitsü.