PM Modi-i Covaxin dose mezüngbuba agiogo

New Delhi, March 1 (Agencies): Hombarnü Prime Minister Narendra Modi-i Covaxin indang dose mezüngbuba agia linük nung COVID vaccine tanabuba agütsüba maparen tenzüktsüogo.

All India Institute of Medical Sciences (AIIMS), Delhi nung PM Modi-i Bharat Biotech ajanga yangluba Covaxin agi.

“Tanü AIIMS nung COVID-19 vaccine dose mezüng agiogo. Alima nung COVID-19 anema rara nung doctor aser scientist temi mapang tatsüka tsüngda mapa tajung inyaktetba atema süngmanger. Vaccine agitsüpur ajaki menungnangi agitsü mepishir” ta PM Modi-i metetdaktsü.

“Asenok külemi India nung COVID-19 samatsüdi” ta paisa ayongzük.

PM Modi-i vaccine agiba sülen ghonda ishika lir Union Home Minister Amit Shah-ia vaccine agiogo.

Medanta Hospital doctor temi Amit Shah nem vaccine agütsü aser tanü External Affairs Minister Dr S Jaishankar-ia vaccine agiogo.

Covaxin ya India nung Bharat Biotech-i Indian Council of Medical Research (ICMR) den yaritepa yangluba lir.

Ano, linük nung tang amshiba tanabuba vaccine ji Serum Institute of India (SII) ajanga yangluba Oxford-AstraZeneca indang Covishield lir.

Alima nung lennir aikati Covid-19 vaccine agiogo aser tanü PM Modi-a parnok den züngsemogo.

Yaküm December ita US President Joe Biden aser Vice President Kamala Harris nati mapa tasen magizükdang Covid-19 vaccine agia liasü.

Taküm January nung Britain nung Queen Elizabeth (94) aser ka kinungbo Prince Philip (99) nati Windsor Castle nung vaccine agi. Kasa ita UN Secretary-General Antonio Guterres-ia vaccine agiogo.

January nungsa Saudi Arabia nung King Salman-i vaccine agi. Par jabaso aser Crown Prince Mohammed bin Salman-i yaküm December ita vaccine agi.

December ita nung Israeli Prime Minister Benjamin Netanyahu-ia Covid-19 vaccine agiogo.