PM Modi-i Doklam aser CPEC atema jembitsüla: Rahul Gandhi

New Delhi, Rongchii/April 27 (Agencies): Tanü China kübok Wuhan yimti nung Ato kilonser, Narendra Modi aser China Tir, Xi Jinping na ajurutepba mapang nung Congress Party Tir, Rahul Gandhi-i Ato kilonser dang, nai China Tir den Doklam aser CPEC onük atema jembitsüla, ta ashi.
Tanü Rahul-i twitter ajanga, “Temeim Ato kilonser, nai onük kecha nunga majemdaki China semdangba noksa TV nung ngushiogo. Na shisabulur ama reprangtet,” ta ashi.
“Nenshia metetdaktsür: (1) DOKLAM; (2) China Pakistan Eco Corridor ji POK (Pakistan occupied Kashhmir) ajanga süir. Ibaji India nunger litsü lir. India nungeri item tongtibang onük atema nai jembiba anganür,” ta Rahul-isa metetdaktsü.
Yaküm Doklam nung India aser China sepaitem tsüngda rara adoktsüsa anogo 73 tashi tensa mejungi liasü.
Ano CPEC ya China aser Pakistan nati asalentong kar yur inyakba Belt and Road Initiative project ka lir, aser iba project ajanga Pakistan-occupied Kashmir süiba ajanga India-i ashishir.
“Onoki na (Modi) nungitttsü,” ta Rahul-isa ashi.
Anogo ananü senden tenzüka tanü Ato kilonser, Modi aser China Tir na ken o jembi tenzükogo.
Iba mapang nung lenir anati linük ana tesendaktep aser alima tebilemtsü onüktem nung o lemteptsü.
Tanep Congress communications-in-charge, Randeep Surjewala-ia Ato kilonser Modi dang China den Doklam atema jembitsüla, kechiyong ibaji ajanga India linük security kongshitsü, ta metetdakja liasü.
Yashia Karnataka nung assembly election nüboyim sentong ka nung jembidang Rahuil Gandhi-i, Ato kilonseri pa teko tasazük inch 56 aliba indang jembiogo saka pai jembiba oji tazüngla, ta aitsü.
“Modi-i China Tir den sangshishiba (swing) ka nung külemi amen, iba sülen China Tiri par sepaitem Doklam-i yok, ajisüaka teko tasazük 56 alisangi iba atemaji ojang kata mejembi. Tang pa ano aeroplane ka nung China-i ogo,” ta Rahul-isa aija liasü.