PM Modi-i Farm Laws 3 meyipa agiba osang metetdaktsü

New Delhi, November 19, 2021 (Agencies): Centre-i ashishitep aketba Farm Laws asem meyipa agir anungji lungkak aitba aluyimertem kidangi aotsü mepishir, ta Prime Minister Narendra Modi-i Hokolbarnü metetdaktsü.

Delhi aser linük kübok tesem ajungalen aluyimertemi Farm laws asem anema lungkak aityonga arur joko küm ka ajunger.

“Centre, agri experts aser aluyimertem adenba luden ka sorkari shimogo aser parnoki aluyimertem ajangzüktsü asoshi lenmang bushiteptsü” ta PM Modi-i ashi.

“Ni mapa tajung maneni inyaktsü. Ni inyaktsüba linük atema lir aser kechi inyakdir linük atema dang asütsü. Nenok pungmangtem asangsang akümtsüsa ni talila inyaktsü” ta pai metetdaktsü.

“Ni küm 50 jungnüa nübor asoshi inyaka arudang aluyimertemi tayongzükba ajurubatem nguogo. Iba jagi kü nem 2014 nug Prime Minister inyaktsü maongka agütsüdang agriculture development aser farmer welfare nung temolung agütsü” ta Modi-i ashi.

“Tanü ni nenok dang aser linük ajunga dang onoki agricultural laws asemprong meyipa agitsü telemtetba agiba osang metetdaktsür. Tan ita agitsü aliba Parliament session nung onoki ozüngi melaba ama agricultural laws asemprong meyipa agitsü” ta paisa metetdaktsü.

“Linük nung zero budgeting based agriculture ajungkettsü aser minimum support price (MSP) maparen tajungba akümtsü atema luden ka tentettsü. Iba luden nung centre, state sorkartem, aluyimertem, agricultural scientists aser agricultural economists nungi teshimtet nübotem adentsü” ta Prime Minister-isa metetdaktsü.

“Parliament nung ozüng asem meyipa magi tashi onoki lungkak aittsü” ta Bharatiya Kisan Union (BKU) tanishir Rakesh Tikait-i Hokolbarnü ashi.

“Sorkari aluyimertem den minimum support price (MSP) aser tanga onüktem atema jembitsüla” ta Rakesh Tikait-isa ashi.

“Democracy inyakyim nung lungkak aitba ajanga mekoktetbaji elections agitsü atema aliba tsübua bilemba ajanga kokteter” ta Congress lennir aser taoba Union finance minister P. Chidambaram-ia metetdaktsü.

“PM Modi-i farm laws asem meyipa agiba ya policy melenshiba mesüra tangatetba melenshiba ajanga masü saka elections tsübuba ajanga agiba lir” ta pai ashi.

Punjab Congress president Navjot Singh Sidhu-ia aluyimertemi lungkak aitba ajanga takok tulu nguogo ta metetdaktsü.