PM Modi-i February nung Tripura semdangtsü

Agartala, Luchii (December) 11 (Agencies): Prime Minister Narendra Modi-i sangküm February ita Tripura semdangtsü aser mapatong aika lapoktsütsü, ta sorkar ketdangser kati ashi.
Mapatongtem rongnung Cancer centre ka yanglushiba dena lir. Iba regional centre nung küm shia cancer agi shiranger 2,000 dak tema anepalur, ta paisa ashi.
2013 aser 2016 tsüngda cancer agi shiranger nisung 3,786 tashi taküm sama ta sorkar report nung ajanga ashir.
Hombarnü cancer hospital project indang maparen meyipa reprangshimtsü atema kanga temaba jenjang nung senden ka amen, ta chief minister Biplab Kumar Deb atema media adviser Sanjoy Mishra-i ashi.
“Prime Minister-i mapatong aika lapoktsütsü atema February ita Tripura semdangtsü. Iba nung cancer centre indang ki tasenba dena lir. Chief Minister Biplab Kumar Deb-i iba dak sendakba maparen meyipa reprangshimogo” ta Mishra-isa ashi.
Hombarnü amenba senden nung Chief Secretary LK Gupta, Public Works Department (PWD) secretary Manoj Kumar aser Health and Family Welfare secretary Samarjit Bhowmik nungertem aden.
“CM-i asüng (Bodbar) New Delhi-i aotsü aser prime minister den ajurutepa onük aika jembitsü” ta Mishra-isa shisem.