PM Modi-i Gorakhpur tensa mita reprangdar

New Delhi, August 12 (Agencies): Uttar Pradesh, Gorakhpur nung aliba hospital nung anogo ishika tsüngda tanur 30 shi asüba sülen Ato kilonser, Narendra Modi-i iba tensa mita reprangdar, ta tanü Prime Minister’s Office (PMO) osang ka ajanga metetdaktsü.
Minister of state for health, Anupriya Patel aser Union health secretary, CK Mishra nati Gorakhpur tensa atema inyaktsü, ta PMO osang ajangasa metetdaktsü.
Hokolbarnü Gorakhpur District magistrate, Rajeev Rautela-i, sorkari ketdangsüba Baba Raghav Das Medical College nung ghonda 48 tsüngda tanur 30 süogo, ta metetdakja liasü.
Ano iba hospital nung paediatric department osang ajanga, August 7 nungi tenzüka tang tashi nung tashidak balala agi tanur 60 süogo, ta metetdaktsü.
Gorakhpur Superintendent of Police (SP)-i ashiba agi, tanur 21 bo iba hospital nung liquid oxygen maliba agi asü, aser item kuli maneni bushisüngdangdar.
Tanü Uttar Pradesh Deputy Chief Minister, Keshav Prasad Maurya-i, item tatalokba nung aibelenertem nem temerenshi tulu agütsütsü, ta metetdaktsüogo.
Baba Raghav Das Medical College nung tanur aika asüba sülen Honibarnü Uttar Pradesh sorkari college principal mapa nungi anentsüogo.
Ajisüaka osangbenertem den jembidang principal jagibo, “Tai maket tanur aika asüba atema ni kuli agia kü sasa mapa nungi sodi meshi,” ta metetdaktsü.