PM Modi-i Gujarat nung Ro-ro project tenzüktsü

New Delhi, October 22 (Agencies): Assembly election agitsü aliba state, Gujarat nung tanü Ato kilonser, Narendra Modi-i ‘Ro-Ro’ (Roll on roll off) service tenzüktsüogo; iba ferry service ajanga Gujarat nung Ghogha aser Dahej na tsüngda senzüdang ghonda 8 agia aliba nungi ghonda ka ajemtsü.
Ghogha (Bhavnagar district) aser Dahej (Bharuch) na tsüngda ‘roll-on, roll-off (ro-ro)’ ferry service mezüngbuba shilem ya sen crore 615 indoka yanglu. Iba service ajanga jila ana tsüngda lenmang kilometer 310 aliba nungi kilometer 30 ajema akumtsü.
Iba project tenzüktsüba sentong nung jembidang Modi-i, iba project ya ajanga Gujarat nunger nisung crore 6.5 taginüba ataloktsütsü, ta metetdaktsü.
Opposition party aija pai, taoba sorkaribo iba project ya takok ngua meinyaktettsü ta jembia liasü, ta ashi.
“Mapa ajak inyaktsüji kü nem tiaja lir,” ta pai ashi.
“Mapangji sen lir ta jembir, aser shingaia mapang memelenshitettsü, ajisüsaka India sorkar aser Gujarat sorkari natibo nenok nem anogo nung ghonda 7 agutsütettsü,” ta Modi-isa ashi.
Paisa, state nung maritime university ka aser maritiam museum ka lapoktsü atema maparen teinyakdak lir, ta metetdaktsü.