PM Modi-i Haryana nung tensa meraksatsü CM dang tuyuogo

New Delhi, March 17 (Agencies): Tanü Ato kilonser, Narendra Modi-i Union Home minister, Rajnath Singh aser Haryana Chief Minister, ML Khattar na dang, taoba ita Jat nunger Haryana nung lungkak aitdang atalokba ama security meraksatsüla, ta tekümdangtsü tetuyuba ka agütsüogo.

Haryana nung Rohtak aser Hisar den district ka nung Jat lenirtemi parnoki akhangbatem ghonda 72 tsüngda mataloktsüra parnoki tanaben lungkak aittsü ta amokmerenba sülen tanü Modi-i iba tetuyuba agütsüogo.

Centre-i paramilitary sepai company 80 shi (sepai 800) state-i yoka Rohtak aser Jhajjar district tem nung timba toktsüogo aser security sepaitemi Flag Marches kadar.

IGP, Rohtak Range, Sanjay Kumar-i, “Onok dangi paramilitary sepaitem arua lir. Police yakyaka lir aser (tensa azüoktsü atema) onoki mera ajak agidar,” ta ashi.

Rohtak, Jhajjar aser tanga tesemtem nung tang tensa indang asüngdangba langzüdang IG-i, “Tang-tangbo tensa süngjema lir,” ta ashi.

Ketdangsertem osang ka ajanga ashiba agi, Jat nungertemi parnok akhangtem agizüktsü atema mapang latettsüba nung ajemdaker Jind aser Sonipat na densema jila aika nung security sepaitem tali yokogo.

Hombarnü Jat nunger lokti tentet aikati, Manohar Lal Khattar’er sorkari ghonda 72 tsüngda parnoki akhangbatem mataloktsüra parnoki maneni lungkak aittsü ta amokmerena liasü, aser tanü iba mapangji atemer.

Haryana sorkari asüng senden ka amentsü atema Jat nunger lenirtem jaoka lir, anungji iba mapang tashi nungjibo lungkak maittsü imlar.

Taoba ita hopta jungnüa state tesem ajaklen Jat nungeri reservation atema lungkak aitdang nisung 30 dak tema süogo.