PM Modi-i Jaitley dang anentsü temaitsü sayuogo: Yechury

New Delhi, December 22 (Agencies): Mongolbar nü CPI-M General Secretary, Sitaram Yechury-i, Hawala ken o nung LK Advani-i menden toktsüba den medemdanga, DDCA ken o nung menden nungi anentsü atema Ato kilonser Narendra Modi-i Finance Minister Arun Jaitley dang temaitsü sayuogo, ta ashi.

Osangbenertem den jembidang Yechury-i, “Advani den kasa medemdanga Ato kilonseri Arun Jaitley dang pa anema ken o benoka alibaji bentetba sülen tanaben meyipa arutsü temaitsü sayuogo. Jaitley dang, nai-a kasaji inyaktsüla ta temaitsü sayuba ama ni angateter,” ta ashi.

Hawala ken o nung Advani-i pasasa anen ta shia pai, Finance minister-i timtem ka ajuruba mapang Ato kilonseri ajungbena lenir tain (Advani) bilemtet ta Jaitley-i angatettsüla, ta ashi.

Ato kilonser Modi-i, Hawala ken o nung opposition-i L K Advani-i anema ochimashi ken o benokaka iba ken o nung pai takok anguba ama Jaitley-ia takok angutsü ta jembiba dak sentakba tasüngdangba ka langzüdang Yechuri-i item o jembia liasü.

Ayodhya nung Ram tekülem ki yanglutsü atema longru aser tongshitem bendendar ta osang angazükba dak sentakba nung tasüngdangba ka langzüdang Yechury-i, “Joko yangji kecha meinyaktsüla ta lemteta lir aser iba telemtetba agiba nungji BJP-a densema lir. Parnoki ibaji anema inyaknüra, ozüng ajanga ibaji bentettsü,” ta ashi.