PM Modi-i J&K atema crore 80,000 nangzük

Srinagar, November 07 (Agencies): Tanü Ato kilonser Narendra Modi-i Jammu & Kashmir state nem sen crore 80,000 agütsütsü nangzükba den külemi tan putu den liromedema state melenshitsütsü aser azükaru state ka kümdaktsüba den külemi state nung sen agi anüng-aponga malitsü, ta ashi.
Taoba Ato kilonser Vajpayee-i jembiba o- “Kashmir sobaliba, loktiyimten, aser meimchir asoshi” ta jembiba lepshia Modi-i, “Ni item mantra asem atema inyaktsü. Item tongshi ya Kashmir terenlok atema lir,” ta ashi.
“Kashmir atema ni nisung shinga dang nungi sayutsüngi o mesüra tebushitetba menüngdaker. Atal (Vajpayee)’er tangatetba asem, item yagi tejakleni aoba nung yaritsü. Kashmir medeni India ji tabensa masü. Iba li nungi Sufi sobaliba adok aser iba sobaliba ajanga longjema alitsü aser telongjem tashi sayuogo,” ta Modi-i ashi.
Modi-isa, “State atema Centre-i sen crore 80,000 sangdonger. Iba sen ajanga nenok tia melenshitsü ta ni sarasademtsür. Iba sen ya ajanga state ya azükaru aser terenlok aliba Jammu & Kashmir state tasen ka akümtsü atema amshitsüla,” ta ashi.
“Iba ya tatembang masü. Sen crore 80,000 ya tatembang masü. Iba ya tetenzüker ka dang. Iba senpong ya nenok atema. Nenok atema onoki bilemtsür,” ta Modi-i ashi.
Tanü Sher-e-Kashmir cricket stadium nung agiba lokti senden nung Ato kilonser den state Chief Minister, Mufti Mohammed Sayeed, Union Minister Nitin Gadkari aser Jitendra Singh na aser PDP Tir Mehbooba Mufti nungera liasü.
“Tesüiba küm 20 tsüngda putu ana mangdang samaogo, ajisüaka ni tajungtiba dang imlar aser tejakleni oa Jammu & Kashmir ya tan putu ama terenlok state ka kümdaktsüner,” ta Modi-i ashi.
Modi-isa, state nung aliba lanurtemi mapa nüngdaker aser iba atemaji Mufti Sayeed-i aniba PDP-BJP teloktep sorkar yaritsü atema Centre sorkar lir, ta ashi.