PM Modi-i J&K, Gurez nung sepaitem den Diwali among

Jammu and Kashmir, October 19, 2017: Brihostibarnü Ato kilonser, Narendra Modi-i Jammu & Kashmir nung Line of Control (LoC) anasa Gurez Valley nung Indian Army aser BSF sepaitem den külemi Diwali benjung amongba mapang tangokba noksa nung angur. Kasa noksa nungsa Army tongti, General Bipin Rawat-a angur.

Jammu, October 19 (Agencies): Brihostibarnü Ato kilonser, Narendra Modi, North Kashmir, Bandipora district kübok Gurez Sector (LoC) nung sepaitem den Diwali amongtsü atema arua liasü.
Osang ajanga ashiba agi, tanep Ato kilonser, Modi Gurez sector tonga aruba sülen 15 Corps sepaitem den Diwali benjung külemi among.
Pa den Army tongti, General Bipin Rawat, Northern Command chief Lt General Devraj Anbu aser Chinar Corps Commander Lt Gen J S Sandhu nungera liasü.
Sepaitem den nanglong lemsatepba sülen jembidang Ato kilonseri, Armed Forces nung sepaitem den külemi amongdang pai tashi tasen angur, ta ashi.
Sepaitemi tsüngsang-mopung tamajung aser tensa ajak nung timtem aremzüka linük tenzüker, ta pai ashi.
Paisa, sepaitem taküm jenjang tajungba akumtsü atema Union sorkari akokba tashi inyakdar, ta metetdaktsü.
Ato kilonserisa Centre sorkari OROP scheme benoka inyakba indang metetdaktsü.
Modi Ato kilonser akumba sülen pai tang agi tanabenbuba Kashmir nung sepaitem den Diwali külemi amonger. 2014 küm nunga pai Kashmir nung sepaitem den iba benjung külemi monga liasü
2016 küm nung Modi-i Himachal Pradesh, Kinnaur district nung Indo Tibetan Border Police (ITBP), Indian Army aser Dogra Scouts den külemi Diwali monga liasü.
2015 küm Modi-i Amritsar kübok Khasa nung sepaitem den Dograi War Memorial nung Diwali monga liasü.
2014 küm nunga Modi-i Siachen nung sepaitem den külemi Diwali among.
October 20, 2017 nü Ato kilonser, Modi-i Uttarakhand nung Kedarnath Shrine semdangtsü, aser iba mapang nung pai ‘temple protection wall’ semzüktsütsü.