PM Modi-i JP Morgan International Council nungi züngsemtem ajuru

New Delhi, Mongputeni/October 23 (Agencies): Mongolbarnü Ato kilonser, Narendra Modi-i JP Morgan International Council züngsemtem ajurua parnok dang 2024-25 küm tashi nungbo India rongsenkettsüng trillion $5 akümtsü atema meranga inyakba indang metetdaktsüogo, ta ketdangsertem osang ka ajanga metetdaktsü.
Council nung züngsemtemji taoba mapang UK Ato kilonser, Tony Blair, taoba mapang US secretaries of state Condoleezza Rice aser Henry Kissinger na aser Tata Sons chairman emeritus Ratan Tata nunger liasü.
Ato kilonseri twitter ajanga, “Asalentong yanglurtem, shisashirtem, yimsüsürtem, industry nung captains aser tasen apiteta inyakertem densema aliba JP Morgan International Council ajurua senden junga menogo. Senden nung India-i anema-alibaren, shisaliok ajungkettsütsü aser India rongsenkettsüng trillion $5 akümtsü atema jembiogo,” ta metetdaktsü.
Modi-isa, pai Kissinger, Blair aser Rice nunger den alima nung tongtibang onük balala nung o lemtepogo, ta metetdaktsü.
“Taoba mapang British Ato kilonser, Tony Blair den jangratema senden menogo. Pai par linük atema tajung aika inyakogo aser pa den alima onüktem nung o lemtepogo. Alima nung lenirtem den jangratema o lemtepogo,” ta paisa metetdaktsü.