PM Modi-i June 4 nü nungi tenzüka linük 5 semdangtsü

New Delhi, May 30 (Agencies): Ato kilonser, Narendra Modi-i linük pongu semdangtsü atema June 4 nü apusotsü; item linüktem rongnung Afghanistan, Qatar, Switzerland, US aser Mexico linüktem lir.
Ato kilonser, Narendra Modi-i Afghanistan mezüng semdanga yangji India-i senotsü agi yaria yangluba Salma Dam lapoktsütsü. Iba dam ya sen crore 1400 shi intoka yanglu.
Afghanistan semdangba sülen pai Qatar semdangtsü aser iba linük nungi pa Switzerland-i aotsü.
Anogo ana Qatar semdangba mapang Modi-i Qatar Emir, Sheikh Tamim bin Hamad Al-Thani den rongsenkettsüng aser hydrocarbon onük densema linük ana tesentaktep onük aika jembitsü sentong lir.
Switzerland nunga Ato kilonseri Tir, Johann Schneider-Ammann densema Swiss lenirtem ajurutsü aser iba mapang nungsa pai Swiss ketdangsertem den India nungeri black money rizüngba onük nung teyari meshia jembitsü akok.
Osang ajanga angazükba agi, India aser Swiss linük na nungi ketdangsertem tsüngda saru dak sentakba onüktem nung osangtsüsang lemsateptsü atema inyaktepdar.
May 18 nü Switzerland sorkari India aser tanga linüktem den saru dak sentakba nung ozüng tasen ka latettsü atema o lemtep kaogo. Switzerland sülen June 7 nü Modi US-i aotsü.
Tamalen US Tir, Barack Obama-i Modi jaoka liasü. US semdangba mapang Modi-i US den defence, security aser energy nung teinyaktetbatem asadangtsü aser pai US Congress Joint Meeting nunga jembitsü.
Pa US nungi shilangba mapang pai Mexico semdangtsü. India-i shishilembabaren aser investment nung tesentaktep yanglutsü atema Mexico linük dak ranglokdar.
Yaküm Sept. ita nung Modi UN nung adentsü atema New York-i aodang pai Mexico Tir, Enrique Pena Nieto ajurua liasü.
2014 May ita nung Modi Ato Kilonser akumba sülen pai tang tashi nung semdangba linüktemji- Australia, Afghann, Bangladesh, Belgium, Bhutan, Brazil, Canada, China, Fiji, Germany, Iran, Ireland, Japan, Kazakhstan, Kyrgyzstan, Malaysia, Mauritius, Mongolia, Myanmar, Pakistan, Saudi Arabia, Seychelles, Sri Lanka, South Korea, Tajikistan, Turkey, Turkmenistan, United Arab Emirates, United Kingdom aser Uzbekistan lir. Iba dak alia pai France, Nepal, Russia aser Singapore linüktem anaben semdang aser United States bo asemben semdangogo.