PM Modi-i Kerala tensa asadangba sülen sen cr. 500 nangzük

Luroi/August 18, 2018 nü Kerala state kübok Kochi nung Ato kilonser, Narendra Modi leniba nung state nung tongti ketdangsertem den senden ka amenba noksa nung angur. 

New Delhi, Luroi/August 18 (Agencies): Tanü Ato kilonser, Narendra Modi-i tayimtsü nungi Kerala nung tzümetsüng agi kongshia aliba tesemtem repranga asadangba sülen Kerala nem sen crore 500 teyari agutsütsü sangdong.
Tamalen Centre sorkari Kerala nem sen crore 100 teyari agutsütsü sangdonga lir.
Kerala nung tzünglu tali aruba ajanga tzümetsüng aser anentsüh lendong nung nisung 300 dak tema süogo.
Ato kilonserisa Prime Minister’s National Relief Funds (PMNRF) nungi item lendong nung asürtem shia kinunger nem sen lakh anana aser kanga mejungi yirua alir shia nem sen 50,000 agutsütsü ta metetdaktsü.
Tanü pa den Kerala Chief Minister Pinarayi Vijayan, state Angh, P Sathasivam aser Union Tourism Minister, KJ Alphons nunger dena liasü.
State nung tzümetsüng tensa asadangtsü atema tanep Modi-i state CM Vijayan, KJ Alphons aser tongti ketdangsertem den senden ka ayongzüka amen.
Yashi nikongdang Modi Kerala yimtiba, Thiruvananthapuram tonga aru aser tanep pa Kochi airport tonga aru.
Ato kilonser Thiruvananthapuram tonga aruba mapang nung CM Vijayan, Kerala Angh P Sathasivam aser Union Minister Alphons nungeri pa agizüka liasü. Tanep Delhi Chief Minister, Arvind Kejriwal-ia phone ajanga CM Vijayan den jembia liasü.
Tanü high level senden tembangba sülen Ato kilonseri twitter ajanga, “Kerala nunger dak raraba tanela aliba atema ni parnok nem tenüngsang agutsür. Iba ama mapang nung linüki Kerala nungiter,” ta ashi.
Ato kilonserisa item lendong nung asürtem atema mangyimer aser yirua alirtem tekaraba nung aneptsü imlar, ta ashi.
Modi-i, “Kerala nung tzünglu maneni aruba ajanga tzümetsüng lendong nung asürtem kibongtem den ni mangyimer. Yirua alirtem tekaraba nung aneptsü imlar. Kerala nunger kümzüka alitsü atema asenok ajaki sarasademer,” ta metetdaktsü.
Modi-isa ketdangsertemi anibelem jenti arema tensa azüoktsü atema kanga meranga inyakba asoshi tenüngsang agutsü, iba denji külemi linük tesem ajaklen nungi nüburtemi Kerala atema bilemtsüba atema pelaba lemsatep.
Kerala nung tzümetsüng tensa dak sendakba osang kar:
* Kerala nung tzütepdang 80 lapokogo, nisung 324 süogo aser nisung 2,23,139 shi relief camp 150 shi nung jenoka lir.
*Tzümetsüng agi tamajungtiba kongshiba district tem nung yashi nisung 80,000 dak tema kümzükogo, aser parnok rongnung nisung 71,000 shibo Ernakulam district nungi liasü.
*Odisha Chief Minister, Naveen Patnaik-i Chief Minister Relief Fund nungi sen crore 5 teyari agutsüsü sangdongba den küemi Kerala nung kümzükba maparen inyaktsüa atema fire personnel 245 yokba den rong agutsütsü, ta metetdaktsü.
* Bihar Chief Minister Nitish Kumar-i Bihar Chief Minister Relief Fund nungi sen crore 10 teyari agutsüsü sangdongogo.
* Indian Coast Guard-i Kerala nung tzümetsüng agi kongshia aliba tesemtem indang map ka sayaogo.
* Haryana Chief Minister Manohar Lal Khattar-i Kerala state nem sen crore 10 teyari agutsütsü sangdong.
* NDRF DG, Sanjay Kumar-i NDRF team 58 Kerala kübok district 8-i yokogo aser parnoki nisung 170 kümzükba den nisung 7,000 shi aienshidaktsüogo, ta ashi. Ano nüngdak dang süra team tali yoktsü, ta paisa metetdaktsü.
* Kerala CM, Vijayan-i Ato kilonser, Modi dang, tang tashi nung Kerala tzümetsüng lendong ajanga sen crore 19,512 shi takoksa anguba asadangtetogo, ta metetdaktsü.
Kerala Chief Minister-i, state sorkari Centre dang sen crore 2000 teyari meshi, ajisüaka Modi-i sen crore 500 dang sangdong ta metetdaktsü.
CM-i twitter ajanga, “Ato kilonser, Narendra Modi-i sen crore 500 teyari agutsütsü ta sangdong. CM-i senotsü teyari crore 2000 agüjang ta mepishia liasü. Iba teyari atema onoki Centre dang pelar,” ta metetdaktsü.