PM Modi-i kümsük tanabuba inyakdang Naga yimten latettsü

Kohima, June 5 (TYO): Prime Minister Narendra Modi-i kümsük tanabuba inyakdang Naga yimten latettsü ta BJP Nagaland-i tanü metetdaktsü.
“Centre nung Prime Minister Narendra Modi-i aniba sorkari Naga yimten tebilemtsü latettsü” ta Deputy chief minister Y Patton-i ashi.
BJP-i aniba NDA sorkar NAMO 2.0 takok anguba tenüng nung BJP Nagaland-i benjung ka ayonga amungdang Y Patton-i iba osang metetdaktsü.
Congress sorkar mapang Naga tebilemtsü ya küm 35-40 tashi melateti toktsü. Ajisüaka, taoba Prime Minister Atal Behari Vajpayee-ia Naga nunger putiotsü khenyongi balaka ta asüba agizük, ta paisa ashi.
Prime Minister Modi lenisüba kübok August 2015 nung Framework Agreement sign asü aser tang pa kümsük tanabuba atema inyakdang pai Naga yimten latettsütsü ta onoki imlar, anungji asenok ajaki pa atema nendaka sarasademtsüdi, ta Patton-isa ashi.
Nagaland nung People’s Democratic Alliance (PDA) sasep nung tesentaktep azüla aoer ta asüba olen atema Patton-isa ashiba agi “onok MLA 12 ka dang küma longjema lir aser Chief Minister Neiphiu Rio den dena lir. Pa ya Nationalist Democratic Progressive Party (NDPP) lennir lir.”
“Taoba Naga Peoples’ Front (NPF)-i aniba DAN sorkar ama tensa majurutsü saka onoki 2023 tashi kümsük tembanga inyaktsü. Lenisüba tebilemtsü atema onoki Kazaringa nung mamungtsü saka Chief Minister Neiphiu Rio lenisüba kübok kümsük tembanga inyaktsü” ta paisa metetdaktsü.
“Party züngsemtemi Opposition NPF-i jembiba nung mamangtsüla kechiyong parnok teinyaktsü kecha mali, anungji taruba elections tashi olulutem jembitsü” ta Patton-isa ashi.
Modi nem tenüngsang agütsüba olen ka ashidang ‘phir ekbar Modi sarkar’ masü saka ‘phir ekbar Modi sarkar’ asütsüla ta Deputy Chief Minister-isa shisem.
Nagaland nung alirtemi BJP ya Khristan anemertem ta züngshiba atema sasar. Linük nütsüng yongsük crore 130 shi ka nungi Khristantem 2% dang lir aser Nagaland nungi MP ka dang lir. Anungji, Centre nung kechi sorkar arudir aruaka, Hindu sorkarsa asütsü. Ajisüaka, BJP-i tamangba yimsü nung ajemdaker meinyaker aser Khristantem manemer, ta paisa metetdaktsü.
Sentong nung BJP Nagaland president aser Higher and Technical Education Minister Temjen Imna Along-ia o jembidang, “NDPP den tesentaktep akangakanga lir aser national leadership den tesentaktep tajungba ka meyanglu yashi onok maneni yariteptsü” ta ashi.
“NDPP-i onok nüngdaker aser onokia parnok nüngdaker. Party züngsemtemi kati ka indang tamajung mejembitsüla aser lenisüba sülen anidaktsüla” ta paisa ashi.
“NAMO 2.0 ya otsüsütsü tatalokba ka lir aser iba ajanga BJP sorkar anema bilemba aika samatsüogo. Iba takok atema Modi nem tenüngsang agütsür. Takok anguba ya terenlok tali nüngdakba sensakertem atema aser ano linük tali akangshitsü aser renloktsü atema lir” ta Imna Along-isa ashi.
BJP president Amit Shah-i kanga dang shisa kaa linük kübok tesem ajunga atongba aser takok tulu anguba atema tenüngsang agütsür, ta paisa shisem.
“Nagaland nung PDA-i takok anguba nung BJP karyakartas-ia shilem agi. Iba takok atema Chief Minister Neiphiu Rio aser Tokheho Yepthomi na nem tenüngsang agütsür” ta Minister Along-isa metetdaktsü.
“BJP Nagaland-i Khristantem anema mapa kecha meinyaker saka külemi longjemer national party ka ajanga Naga nunger renloktsü aser ajungtsü atema inyaker” ta paisa ashi.
Iba sentong nung BJP MLA 12 tenüng nung Public Health Engineering Minister Jacob Zhimomi aser Health and Family Welfare Minister S Pangnyu Phom nati o jembi.
Sentong nung mendenji BJP State vice president, Subenthung Kithan liasü, Central Baptist Church Kohima, Neisakuolie Mere Kesiyie-i temoatsü meshia sarasadem aser BJP State secretary Pithrongse Anar-i tesentepertem pela agizük.