PM Modi-i linük 5 semdangba sülen meyipa aruogo

New Delhi, June 10 (Agencies): Ato kilonser, Narendra Modi-i linük pongu semdanga senzüba sülen tanü Hokolbarnü linük tonga aruogo; iba mapang nung tongtibangtibaji pai Washington nung US Tir, Barack Obama ajuruba aser US Congress nung o jembiba liasü.
Linük balala den linük tsüngda tesentaktep yanglutsü nükjidong nung anogo troknü tsüngda Ato kilonser, Modi-i Afghanistan, Qatar, Switzerland, Mexico aser US linüktem sema senzü.
Pai tesüsabuba Mexico semdangba sülen Hokolbar anepdang linük tonga aru.
India linüki apusotsü lia Modi-i twitter ajanga, “Kanga pelar Mexico. India-Mexico tesentaktep nung tongtibang mapang ka tenzükogo aser iba tesentaktep ajanga asen nüburtem aser alima nüburtem ajak ajangzüktsü,” ta ashi.
External Affairs Ministry otongdar, Vikas Swarup-ia twitter ajanga, “Anogo pongu, linük pongu! Tesüsabuba Mexico takok ngua semdangba sülen Ato kilonser Delhi-i apusoa aoer,” ta metetdaktsü.
US Congress nung jembiba dak alia Modi-i semdangba mapang Nuclear Suppliers Group (NSG) nung tongtibang züngsem ana- Switzerland aser Mexico natia India NSG züngsem akümtsü atema pusemtsü ta sangdong.
US Tir den ken o aika jembiba sülen US-i, India ji “tongtibang defence partner” ka lir, ta shiogo.