PM Modi-i linük asem semdang tenzükogo

New Delhi, June 24 (Agencies): Ato kilonser, Narendra Modi-i linük asem- Portugal, US aser Netherlands semdangtsü atema Honibarnü apusoa ogo, iba mapang nung pai item linük lenirtem den linük tesendaktep atema jembitsü.
Anogo pezünü pai item linük semdangba mapang nung Modi-i June 26, 2017 nü tang mezüng Washington nung US Tir, Donald Trump ajurutsü.
Modi-i twitter ajanga, “Ni US semdangtsü aliba nükjidongji asen linük ana tesendaktep akangshitsü atema lir. India-US tesendaktep tashi aitba ajanga asen linük ana aser alima tajangzük angutsü,” ta metetdaktsü.
Facebook nung sangdong ka ajanga Modi-i, June 25 nungi tenzüka pai Washington semdangtsü alibaji US Tir Trump-i jaokba lir, ta ashi.
Modi-i Trump aser cabinet züngsemtem den senden amenba dak alia pai America nunger tongtibang CEO tema ajurutsü.
Modi-i Portugal linük tama semdang tenzükogo; pai Portugal Ato kilonser, Antonio Costa ajurua senden amentsü.
Costa den senden amentsü aliba dak sendakba nung Modi-i, “Tawa o lemtep akaba nung ajemdaker künati linük anati longjemer inyakba mapatem reprangshitsü aser telemtetba kar agitsü,” ta metetdaktsü.
US semdangba sülen June 27 nü Modi-i Netherlands semdangtsü aser pai Ato kilonser, Mark Rutte aser King Willem-Alexander den Queen Maxima nungera ajurutsü.
Taküm küm linük anati India-Netherlands tesendaktep yangluba sülen küm 70 ajungba benjungmung amungtsü.
“Ni Ato kilonser, Rutte ajurua linük ana tesendaktep reprangshitsü yongyar. Ni pa den kiralongra anema raraba aser climate change densema alima nung tongtibang onüktem nung o lemteptsü,” ta Modi-isa metetdaktsü.