PM Modi-i LK Advani nem LS election nung toktepdaktsünür

New Delhi, Aami (June) 5 (Agencies): Prime Minister Narendra Modi-i BJP lennir tejen LK Advani nem 2019 Lok Sabha elections nung toktepdaktsünür.
Bengali osangkaket Anandabazar Patrika ajanga BJP lennir tejen Murli Manohar Joshi-a BJP-i toktepdaktsütsü akok.
Advani-i tesüsabuba Lok Sabha election nung toktepbaji Gujarat kübok Gandhinagar nungi liasü. Ajisüaka, pa telok nung balaka mamshii arur.
BJP indang tematiba menden Parliamentary Board nung Advani den MM Joshi naprong maniok.
BJP Party President Amit Shah-i Marg Darshak Mandal ta ser züngsem pungu agi akümba advisory telok ka tentet. Iba nung Prime Minister Narendra Modi, Home Minister Rajnath Singh, Amit Shah aser Joshi o Advani nungertem dena lir saka telok tentetba sülen nungi tang tashi parnok senden ka dang mamen lir.
Anandabazaar Patrika osangkaket ajanga ashiba agi, tawa tu Modi-i Advani den par Prithviraj Road, Delhi nung aliba kidang ajurutep. BJP President Amit Shah-ia pa den ajurutepa election nung tokteptsü atema ashi.
NDA nung yariteper kari teloktep toktsüba aser kari sorkar nung aser menden lemsaba nung shilem tuluba aginüba jembiba mapang ka nung iba mapa ya inyaker.
Shiv Sena aserr Bihar nung JD(U)-i taoba ita BJP den meyaritepnür ama metetdaktsüogo.
Opposition-i linük nung NDA anema teloktep ka tentettsü merangba mapang ka nung aser tawa by-election aika nung opposition-i BJP madak takok anguba mapang ka nung BJP-i Advani aser Joshi na sangküm election nung tokteptsü atema tebilemba lemsateper.
Taoba küm pezü tashi NDA sorkar mapang BJP-i parnok party lennir tejentem ajembanga ayur ta opposition-i aitsür.