PM Modi-i Manipur semdangtsü lia bomb ngutet

Imphal, February 24 (Agencies): Manipur assembly election atema Honibarnü Ato kilonser, Narendra Modi-i state nung nüboyimtsütsü lia tanü Manipur tesem balala nung Police-i hand grenade ka den bomb ka ngutetogo.
Manipur nung telungpur telok troki Modi-i state semdangba anema state tesem ajunga mokdangtsü ayongzükba mapang ka nung bomb ngutetogo.
Ato kilonseri Imphal West District, Langjing Achouba ground nung BJP candidate tem atema nüboyimja jembitsü.
Achouba ground nungi kilometer 9 shi pilar aliba BJP candidate, Soibam Subhachandra’er kikümbang (gate) anasa Chinese-made hand grenade ka ngutet, aser Achouba ground nungi kilometer 40 shi pilar Thoubal district nung BJP nung inyaker, O Sunil’er ki anasa bomb ka ngutet.
Telungpur telok troki akümba Coordination Committee (Corcom)-i Honibar anepdang 6:00 ako nungi Ato kilonseri state toktsü tashi mokdang ayongogo.
Corcom-i sangdong ka ajanga, “February 25 nü Narendra Modi-i Imphal semdangtsü aliba nükjidongji Manipur nunger ashioktsütsü atema semdanger dang lir,” ta ashi.