PM Modi-i Manipur semdangtsü lia telungpurtemi mokdanger

Imphal (Manipur), February 24 (Agencies): Manipur assembly election nung BJP candidates asoshi nüboyimtsütsü atema Ato kilonser, Narendra Modi-i state semdangtsü lia Manipur nung telungpur teloktemi Honibarnü mokdangtsü ayongzükogo, ta Hokolbarnü sangdong ka ajanga metetdaktsü.
Brehostibar aonung tesü telungpur telok troki akümba, Coordinating Committee (Corcom)-i sangdong ka ajanga, mokdangbaji February 25 anepdang 6:00 ako nungi tenzüktsü aser Ato kilonser, Modi-i state yimtiba toktsür mao tashi alitsü, ta metetdaktsü.
Ato kilonseri ghonda ka state semdangba mapang tensa meraksatsü atema security meratem agiogo, ta police-i metetdaktsü.
Corcom sangdong ajangasa, Centre-i putu aika yimjung aser tesünep nung alir teloktem tsüngda rara adokdaktsütsüsa inyaker, ta aitsü.
Nüburtem dang iba curfew mapang nung mayazüktsü parnoki metetdaktsüogo.
Ajisüaka iba mapang nung osangbenertem aser nüngdakba service tembo senzütsü melar.
Manipur nung amenoka aliba telungpur teloktemi Centre nungi tongti ketdangsertem aruba teti anema nokdaker, ta sorkar ketdangser kati ashi.
Police-i ashiba agi, “Iba ama curfew mapang nung nüburtem ki telung nungi mayazüker.”
State sorkar tashi nung aliba party, Congress Party-i, Modi-i state semdangba mapang 2015 küm New Delhi-i NSCN-IM den tezüngzüktep agiba ‘Framework Agreement’ ji sangdongtsüla, ta takhangba agutsüogo.