PM Modi-i minority jenjang agütsütsü imlar: Yihuda nunger

New Delhi, July 02 (Agencies): India nung aliba Yihuda nungeri, Ato kilonser, Narendra Modi-i Israel linük semdangba sülen pai India nung Yihuda nunger nem minority jenjang agütsütsü imlar.
Linük nung India-Yihuda nunger 6,000 shir lir; küm 2,000 tejaklen nungi Yiduda nunger India nung lia arur.
Linük nung Yihuda nunger aika Delhi, West Bengal, Maharashtra, Kerala aser Gujarat state tem nung lir.
Yiduda nungeri ashiba agi, parnok tamangba yimsü atema India nung parnoki timtem kodanga majangshi, saka Ato kilonser, Modi-i par linük, Israel semdangba sülenbo parnok nem minority jenjang agütsütsü imlar, ta ashi.
Ato kilonseri July 4 nungi tenzüka Israel semdangtsü.
Linük yimtiba, Delhi nung Synagougue ka dang lir aser iba synagogue, Judah Hyam nung putir, Ezekiel Malekar-i, “Ato kilonseri linük semdangtsü onoki yongyar aser ozü nübur nem minority jenjang agütsütsü imlar,” ta metetdaktsü.
Pai ashiba agi, Maharashtra state nungbo Yihuda nunger nem minority jenjang agütsüogo, aser kasaji linük jenjang nunga agütsütsü imlar.
Tang linük nung Muslims, Khristian, Sikhs, Buddhists, Zoroastrians aser Jains nem minority jenjang agüja lir.
Ezekiel-isa, “Onok atema, India ya ozü tetsü tasoli lir. Onok India nunger, iba sülenang Yihuda nunger lir. Onok melungjang nung Israel lir, onok azü nung India lir,” ta ashi.
Ano Kochi, Mattacherry nung Israel Yihuda nunger parnok pongu lir, aser parnok rongnung Queenie Hallegua-ia, reshikangshi tia aliba ajanga Yihuda nungeri India toktsür mao, ta ashi.
Laisa, “Parnok ajak pelaa liasü aser kanga junga amenoker lia aru,” ta ashi.
Ano Kolkata nunga Yihuda nunger kibong 26 lir, aser Presidency University, Kolkata nung assistant Professor aser Yihuda nunger, Navras J Aafreedi-i, India aser India na tayimtsü agi indangindanga sendakteptsü nüngdaker, ta ashi.
“Tang semdangba mapang (Modi-i Israel semdangtsü aliba) Israel nungi India tashi tayimtsü agi indangindanga sendakteptsü atema linük anati jembia inyakdaktsüner, koba ajanga onoki yangji aliba kinüngertem aser medemertem melamela ajuruteptettsü,” ta ashi.
Maneni Mumbai nung advocate aser Indian Jewish Federation Mendenbuba, Jonathan Solomon-i, “Asen linük Ato kilonseri timtem agia ozü linük tila ka semdangtsü lemtetba atema onoki pelar. Ibaji ajanga pa tebilemba tajung sayur aser linük ana tesendaktep tajung sayur,” ta ashi.