PM Modi-i Mizoram semdangtsü

Aizawl, December 12 (Agencies): Prime Minister Narendra Modi-i December 16 nü Mizoram semdangtsü ta sorkar sangdong ka nung metetdaktsü.
Modi-i tang mezüngbuba atema Mizoram semdangtsü aser pai Assam Rifles ground nung public sentong ka nung o jembitsü aser iba mapang pai 60-MW Tuirial Hydro Electric Project sayatsütsü, ta sangdong nungsa shia lir.
Sorkar meyong engineering company- Bhel-i Mizoram nung ita ishika tejakdang Tuirial Hydro Electric Project (HEP) indang mezüng aser tanabuba unit tem yanglu.
Iba Hydro Electric Project ya Kolasib district nung lir aser North Eastern Electric Power Corporation Ltd (NEEPCO) indang greenfield project lir.
Tuirial HEP nungi power amshiba ajanga greenhouse gas emissions ajema kümdaktsütsü aser linük nung low-carbon alizüng tongtettsü atema teyari agütsütsü.
Prime Minister-i Assam Rifles ground nungi satellite link ka ajanga iba project sayatsütsü.
Osang ka ajanga ashiba agi, December 16, 2017 nü Prime Minister Modi-i Aizawl nung aliba Lengpui Airport nung arua anentsü aser idak nung jagi helicopter ajanga aotsü. Kasa anogo nungsa pa Shillong-i apusotsü.