PM Modi-i Monaco Prince den Climate Change atema jembi

New Delhi, February 05 (Agencies): Tanü Delhi nung Ato kilonser, Narendra Modi-i Monaco linük Chuba, Prince Albert II ajuru aser iba mapang nung tenati lenla aika nung amalitepa inyaktsü atema jembi, item onük rongnung renewable energy sector aser climate change anema raratsü onük densema liasü.
Yashi Prince Albert, India tonga aru, aser tanü pai Hyderabad House, Delhi nung Ato kilonser Modi ajuru. Pai hopta ka atema India semdanger.
MEA otongdar, Raveesh Kumar-i, lenla aika nung amalitepa inyaktsü atema o lemtepogo, item rongnung environment & climate change aser renewable energy densema liasü, ta metetdaktsü.
India aser Monaco nati 2007 küm linük tesendaktep yanglua liasü, ajisüaka linük ana ya akhidang nungi tembar, ta otongdarisa metetdaktsü.
Tanep External Affairs Minister, Sushma Swaraj-ia Prince Albert ajuru aser iba mapang nung tenatia environment, renewable energy, India nung investment, smart cities, marine ecosystems aser tourism nung amalitepa inyaktsü atema jembiogo.
Hombarnü Prince Albert-i India-Monaco Business Forum senden nung dena liasü.
Prince Albert-i official nüngdaktem tembangba sülen India tesem balala sema senzütsü aser February 10 nü par linüki meyipa aotsü.