PM Modi-i MP nung Rashtriya Gram Swaraj Abhiyan tenzüktsü

Mandla, Rongchii (April) 24 (Agencies): Sangtennü (Mongulbar) Madhya Pradesh kübok Mandla district nung lisopur sentong ka nung jembidang Prime Minister Narendra Modi-i panchayat ketdangpurtem dang küm pungu alizüng yur yimtsüng tia nung alirtem indang rongsenkettsüng jenjang ajungkettsü atema mapa inyaktsü ayongzük.
Tanü PM Modi-i Rashtriya Gram Swaraj Abhiyan tenzüktsü aser iba ya yimtsüng tia nung aliba tesemtem nung ochishia aser tashishitsü melii terenlok mapa inyaktsü atema lir.
“Kodang rural development indang jembidir budget kanga tongtipang lir. Mapatong ka inyaktsü atema sen lemzüktsübaji timi amshitsü atema tanü nisungtemi jembir. Tanü linük indang budget ji nisung ajak atema lir aser onoki yimtsüngtem renlokdaktsütsü atema tanen makai mapa inyaka arur” ta Modi-isa metetdaktsü.
India nung chemical farming kanga ainba atema olen ka jembidang “Aluyimertemi fertilisers kanga mamshi aluyimtsüla. Ibaji ajanga ali meraksatsü. Ano, sorkari yimtsüng nung alirtemi timtem melii pei pok mesütsü atema sen aazüktsü atema grass telemsa nung aou dendaktsüogo” ta Modi-i shisem.
“Asen tsüraburtemi education angutsü atema maongka peria mangu saka asenoki yimtsüngtem nung tanur ka danga school mezüngi meyutsütsü merangdi. Asenoki polio agi shiranger arishi küm 40-50 pur angur saka asen panchayat temi pulse polio drive nungi tanur ka danga mezüngdoktsü merangdi” ta prime minister-isa Congress yimsüsüba aija olen ka ashi.
Paisa yimtsüngtem nung rongsenkettsüng renloktsü atema Jan Dhan, Van Dhan aser Gobar Dhan indang osang metetdaktsü.
2022 tashi rural sector tashi itdaktsütsü atema panchayat ketdangpurtemi mapa inyakang. Iba mapang ya Panchayat Raj indang Golden Era ta bilemtettsüsa inyakdi, ta Modi-isa ayongzük.
Iba sentong nung Prime Minister-i panchayat ketdangser pezü nem sempet agütsü.
Sempet angurtemji- Amarwati Vathia sarpanch (Mandla yimtsüng nung kilen shia nung smokeless chulha amshiba atema), Chulli Baiaga sarpanch (Shahdo yimtsüng nung 100% vaccination anguba atema), Radhabai Dhruve sarpanch (Mandla yimtsüng nung 100% electrification atema) aser Nanhibai Marco (kinungbo asüba atema) nem Jeevan Jyoti Yojana kübok sen lakh 2 agütsü.
Prime Minister Modi-isa Mandla nung LPG bottling plant ka yanglutsü atema lung azüngtsü.
2022 tashi nung yimtsüng tia nung alir kibong shia nem ki agütsütsü mapatong tenzükba atema iba sentong nung CM Shivraj Singh Chouhan-i PM Modi nem tenüngsang agütsü.
Iba mapatong atema Centre-i taruba küm 5 sen crore lakh 2 endoktsü.