PM Modi-i NDA MP tem den jembitsü

New Delhi, August 03 (Agencies): Honibarnü linük tatong Tir election agitsü lia Hokolbarnü Ato kilonser, Narendra Modi-i National Democratic Alliance (NDA) nungi MP tem den jembitsü.
Osang angazükba agi, NDA nungi Rajya Sabha MP 81 aser Lok Sabha MP 337 dak alia AIADMK, YSR Congress aser Telangana Rashtra Samithi (TRS) nungi MP tema iba senden nung adentsü.
Iba senden nung MP tem atema ‘voting demonstration’ agitsü, kechiyong Tir election nung vote 21 bo magila liasü.
Iba senden nungsa NDA lenirtemi tatong Tir candidate M Venkaiah Naidu indanga jembitsü.
Tatong Tir election nung NDA candidate, Naidu-i Congress-i aniba opposition candidate, Gopalkrishna Gandhi den tokteptsü.
Bodhbarnü Naidu-i party balala nungi MP tem dang August 5 nü agitsü aliba election nung yaritsü mepishia pai linük temzüng kübok inyaktsü ta nangzükogo.
Shidi ka ajanga pai MP tem dang pa yimtenren nung küm 40 tashi tenzüka aruba, Andhra Pradesh Assembly nung MLA anaben inyakba aser Rajya Sabha nung MP pezübenren inyakba indang lemsatepa liasü.