PM Modi-i Nepal-Bharat Maitri Pashupati Dharamshala sayatsü

New Delhi, Luroi (August) 31 (Agencies): Hokolbarnü Prime Minister Narendra Modi aser Nepal Prime Minister K P Sharma Olin a külemi Nepal-Bharat Maitri Pashupati Dharamshala lapoktsü.
Temeshi aini aoertem anenzüktsü atema Kathmandu nung yipten 400 aliba Dharamshala ya India-i teyari agüja yangluba lir.
“Ni kanga dang pelaa Kathmandu Nepal-Bharat Maitri Pashupati Dharamshala lapoktsür” ta tanü Prime Minister Modi-i ashi aser Pashupati Area Development Trust ket nung rest house agütsü.
Pashupatinath Temple-i aoertem anenzüktsü atema Dharmashala nung family rooms, kitchen, dining hall, library aser multipurpose halls kar lir.
“Iba ya ki ka dang masü. Nepal-Bharat Maitri Pashupati Dharamshala ajanga kidanger ana tsüngda tesentaktep bilemtetdaktsütsü” ta Modi-isa ashi.
Nepal sorkari asür prime minister Atal Bihari Vajpayee indang sangrotem Nepali oshi nung meyipzüka adoktsü lemtetba atema paisa tenüngsang agütsü.
“Iba temeim mapa atema ni Prime Minister Oli aser Nepal sorkar dang kanga pelar” ta Modi-i ashi.
Buddhism-i kiralongraba aser tali bilemloka ao inyakertemi agütsüba tayongzükbatem koktettsü tesayuba agütsür, ta Modi-isa olen ka ashi.
Tanü India Post Payments Bank sayatsütsü
Maneni, Prime Minister Narendra Modi-i asüng India Post Payments Bank (IPPB) sayatsütsü sentong lir.
Iba sentong ya New Delhi nung aliba Talkatora Stadium ng agitsü aser IPPB sayaba den külemi kongsang 650 aser 3,250 access points 3,250 nung sayatsü, ta tanü sangdong ka nung metetdaktsü.
“IPPB ya nübortemi melamela inyaksangshitetba, akokba aser temulung alemba bank ka asütsü nükla yur lapoker” ta sangdong nungsa shia lir.
“Iba bank ya 100% sorkar meyong lir aser Department of Posts (DoP) ajanga ketdangsütsü. DoP kübok postman aser Grameen Dak Sewak lakh 3 dak tema lir aser December 31, 2018 tashi nung linük nung aliba post office lakh 1.55 tashi IPPB system den sendakteptsü” ta parnokisa ashi.
Tan hopta tetenzüklen cabinet-i IPPB atema sen noklang nung shilem 80 ajungkettsü aser ibaji sen crore 1,435 lir. Iba ajanga Airtel Payments Bank aser Paytm Payments Bank ama bank tem den tokteptsü.