Jan. 23, 2016 nü New Delhi nung Ato kilonser, Narendra Modi-i Netaji Subhas Chandra Bose dak sentakba kulikakettem indang website ‘netajipapers.gov.in’ sayatsüba noksa nung angur.
New Delhi/Darjeeling, January 23 (Agencies): Taoba mapang linük nüjiso atema rarar, Netaji Subhas Chandra Bose sor küm 119 ajungba anogomung nung tanü Ato kilonser, Narendra Modi-i tang mezüng küm 70 tejaklen Netaji samaba dak sentakba miimbanga aliba kulikaket 100 sayatsüogo.
Honibarnü Delhi nung National Archives of India (NAI) nung Union minister ana- Mahesh Sharma aser Babul Supriyo na lia Ato kilonser Modi-i button ka nung nemokja item kulikakettem indang digital copy temji sayaogo. Iba sentong nung Bose’er kinünger züngsem 12 densema liasü.
Netaji’er kinünger Chandra Kumar Bose-i, “Ato kilonser-i temulung ajak agi iba mera agiba atema pela agizüker. Iba anogo ya India nung ‘transparency’ anogo ka lir,” ta ashi.
Yaküm October ita Bose’er kinüngertem den senden ka amenba mapang Modi-i, sorkari Netaji dak sentakba kulikatettem sayatsü, ta sangdonga liasü.
Inquiry Commission anatibo, Netaji ji 1945 küm August 18 nü Taipei (Taiwan yimtiba) nung tayimtsü lendong nung asü ta shiogo. Ano Inquiry ka den par kinünger kar densema nisung aikati, iba nungji hai-haura makai liasü.
Tanep NDTV den jembidang Chandra Bose-i, “Tayimtsü tsükokba ‘theory’ nungji ni mamanger. Tanü, asenoki telangzüba ajakji mangutsü akok, saka temaitsü karbo sayutsü ni imlar,” ta jembia liasü.
Netaji samaba indang theory ano aika lir. Tawa theory ana ajanga- Netaji-i India nüjiso atema maneni raratsü asoshi pa Soviet Union-i ao, saka tepset. Tanabuba theory jagi, Netaji ji temeshi nisung, ‘Gumnami Baba’ ama India-i meyipa aru, aser 1985 küm tashi Uttar Pradesh, Faizabad district nung ali, ta ashir.
“Anungji yangi nisung ka lir. Pa ya temeshi nisung. Pai küm 30 tashi English aser Bengali naprongla nung Subhas Bose züluyim ama züluteter. Anungji item kuli ajanga, Faizabad otsü tsütsülenji sentoktsü mali ama ni bilemer,” ta kaketzülur aser researcher, Anuj Dhar-i shia lir.
National Archives of India-isa ita shia Netaji dak sentakba kulikaket 25 digital copy nung sayatsü sentong lir.
Ano Darjeeling nungi tanga osang ka nung West Bengal chief minister, Mamata Banerjee-i, Netaji Subhas Chandra Bose nem ‘Linük Lenir’ naroküm agütsütsüla ta khangogo.
“Onoki kulikakettemji reprangdangner, koba ajanga Netaji samaba osang tejangja metettsü. Netaji nem ‘Linük Lenir’ naroküm agütsütsüla. Pa iba akhüm angutsü temsüa lir,” ta lai ashi. Yaküm September ita nunga West Bengal nung TMC sorkari Netaji dak sentakba miim kuli kaket 64 sayaa liasü.
You must be logged in to post a comment Login