PM Modi-i ni aitsübaji tiyazü : Manmohan Singh

Guwahati, April 11 (Agencies) : Pai Assam asoshi kecha meinyak ta Prime Minister Narendra Modi-i aitsübaji tiyazü ta Hombarnü taoba Prime Minister Manmohan Singh-i metetdaktsü.
“Prime Minister-i ni inyaksangshiba asadangbaji magizüker saka pai jembibaji tiyazü ta pai meteta lir” ta Manmohan-i Dispur Government High School nung vote agütsüba sülen osangbener den jembidang ashi.
Tesüiba küm 15 tashi Congress-i Assam state atema mapa tajung inyaka aruba atema nübortemi Congress moatsütsü, ta paisa ashi.
Tanü nikongtsütsü 1:00 meta Manmohan-i vote agütsü. 1991 nungi Manmohan aser pa kinungtsü Gursharan Kaur na Dispur constituency nungi electoral roll nung tenüng züluok.
Narasimha Rao sorkar mapang Manmohan Singh Union Finance Minister inyak aser iba mapang taoba Assam Congress Chief Minister asür Hiteswar Saikia-i pa nem Rajya Sabha ticket agütsü.
Manmohan indang address ji Hiteswar Saikia indang taa agütsüba ki ka agüja lir aser electoral roll nung House no. 3989 Sorumataria area, Guwahati ta zülua lir.