Srinagar, Feb. 28 (Agencies): JNU mangatettep ken o dak sentakba nung Ato kilonser, Narendra Modi aija tanü Congress-i, item tatalokba ya pa ajanga lir, kechiyong pai par party züngsemtem mazüoktetba ajanga BJP sorkar tashii aruba mapang nungi rara adoktsüsa aser telemsa adoktsüsa parnoki jembir, ta ashi.
JNU kaketshirtem anema inyakba dak sentakba nung Congress lenir aser Rajya Sabha opposition lenir, Ghulam Nabi Azad-i, Ato kilonseri shimtsü makok, ta ashiba den külemi kechiba BJP züngsemtemi telemsa adoktsüsa jembiba pai mazüokteter, ta asüngdang.
Srinagar nung osangbenertem den jembidang Congress general secretary Azad-i, “Party ajak senden ka nung ni Ato kilonser dang, JNU nung kechisa atalokdar mesüra Hyderabad nung atalokogo, iba ya shiba tai ajanga, ta asüngdangogo. Pa matsüngdang ni, ‘akümtsübua aliba Ato kilonser, nai mejashira iba taiji na aser ner sorkar ajanga lir’ ta shigo,” ta metedaktsü.
Azad-isa ashiba agi, “Ni Ato kilonser dang BJP sorkar tashii aruba mapang nungi minister tem, party nung inyaker, tatartem aser Angh temi Hindu aser Muslim nunger tsüngda rara adoktsüsa jembir ta shiogo.”
“Kibong nung tekolaki shiba merenshitsü’ar shimtsü akok. Nai temerenshi magütsüra, tatishitsü agi kar anentsütsü, nai ibaji meinyakra ner party-i kasa yimyim ayimba ama University telung nung yimyim ayimba atema aitsütsü nü dak temeten mali,” ta Azad-i ashi.
Temerenshi agütsübaji tip külen tsütsü nungi dangbo masütsüla ta shia Congress leniri, “JNU nung yimyim ayimbaji Congress-i aitsür, saka iba tai ya na (Modi) ajanga lir, kechiyong nai ner party mazüoktet. Anungji nisung kari iba den kasa yimyim ayimra, nai pa anema sorkar anemba ken o benoker, saka ner züngsemtem nembo temerenshi magütsür. Iba ya tip külen tsütsü nungi dang inyakba lir. Anungji iba ya Ato kilonser aser sorkar tai ajanga lir,” ta ashi.
You must be logged in to post a comment Login