PM Modi-i Rajasthan assembly election atema BJP nüboyim tenzüktsüogo

New Delhi, Mongputeni/October 06 (Agencies): Taküm küm tatemlen Rajasthan nung assembly election atema tanü Ato kilonser, Narendra Modi-i BJP atema election nüboyim tenzükja Congress party sashia aitsüogo.
Nüburtem dang vote bank politics aser terenlok politics na rongnung ka shimang, ta shia Modi-i BJP-i nüburtem atema inyaktsüba mapatem metetdaktsü.
Opposition party tem aija Modi-i, tanemertemi lokteptsü atema kanga meranga inyaker, saka BJP bo linük longjemdaktsütsü atema mazüngi inyaker, ta ashi.
Election nüboyim sentong ka nung Modi-i, “Kari vote bank atema inyaker aser telemsa adokdaktsütsü atema bilemer. Vote bank politics ajanga yimsüsüba kongshir aser inyakyim raksatsür. Yimlibilema item ama party linüki taitdaktsü,” ta ashi.
“BJP-ibo ajak den longjemer inyakner, aser ajak atema inyaktsüner. Iba nungji asen India tarutsü tia lir,” ta Ato kilonseri ashi.
Congress ya kibong kati yimsüsüba party lir, ta shia Ato kilonseri, “Start aser linük nüburtem onoki tenzüker. Congress atemabo temaba ketdangserji kibong ka lir. Parnok tebilemba ataloktsü atema parnoki ajak inyaktsü. Parnok nem sorkar tashi agutsütsü asü, parnok nem auyadaktsütsü asü, terenlok lenmangji teraksatsüba lenmang kümdaktsütsü asü?” ta pai asüngdang.
“Küm 60 tashi Congress-i vote bank politics asayaa aruogo aser ibaji ajanga timtem aika adok. Terenlok Politics ji Congress-i kodanga magizük,” ta paisa ashi.