PM Modi-i shinga akhüm metsübur: Tarun Gogoi

Sarihajan (Assam), March 28 (Agencies):  Assam Chief Minister Tarun Gogoi-i state nüburtem ashioktsür ta Ato kilonser, Narendra Modi-i aitsüba sülen anogo ka lir Hombarnü Gogoi-i, Ato kilonser kati par lenirtem atema akhümtsübü maliba Ato kilonser ka pa (Modi) ama kodanga mongudang, ta ashi.
Tanü Sarihajan nung osangbenertem den jembidang Assam Chief minister Gogoi-i, “Pai (Modi) tamakok angubatem miimbangtsü atema pai inyaker. Küm ana nung pai kechi inyak (?) Ato kilonser kati tiyazü, tiyazü, tiyazü jembiba aser Ato kilonser menden meraket ajema kümdaktsüba Ato kilonser ka ni kodanga mongudang. Pai ni sensamasatsür aser oang, oang oang ta ashir, pa akhümket mali, India nunger sobaliba alema inyaker, par lenirtem akhüm metsübur. Pai shinga akhüm metsübur. Pai pa kinüngtsü-a majiteter,” ta ashi.
Uttarakhand nung yimtenren tensa dak sentakba tasüngdangba ka langzüdang Gogoi-i, Ato kilonser Modi ji kijai tashi amshiba lenir ka, ta aitsü.
“Pai (Modi) state ajak yimsü süner. Onoki ibaji Assam nungbo memelatsü. Onoki Assam nüburtem dang terenlok agütsütsü nangzükogo. Onoki jembibaji onoki inyaka aruba aser tarutsü nunga inyaktsü indang lir. Onok mezüng onükji mapa adokdaktsütsü aser shisaliok koda melenshitsü, ibaji lir,” ta paisa ashi.
Pai ashiba agi, Ato kilonseri  sen crore noklang aika intoka BJP lenir Himanta Biswa Sharma ji pa matsüngdang temaba kümdaktsüner.
Yashi Assam, Tinsukia nung Modi-i, pai rarabaji Chief Minister, Tarun Gogoi anema masü saka Assam nung sensak tia aser terenlok maliba atema lir, ta jembia liasü.