PM Modi-i Sikkim nung Pakyong airport lapoktsü

Gangtok, Rongjui (September) 24 (Agencies): Hombarnü Prime Minister Narendra Modi-i Sikkim nung Pakyong airport lapoktsüogo.
Iba ya Sikkim nung mezüngbuba airport lir aser linük nung 100 buba. Tanü airport lapokba ajanga Sikkim state-a aviation map nung densemogo.
Pakyong nung Greenfields Airport ya Sikkim yimtiba Gangtok nungi kilometer 30 shi pilar lir aser connectivity tajungba kümdaktsüba den nübortem tajangzük angutsü.
Pakyong Airport ya ali acre 201 nung yanglu aser terminal building ji 3000 square meters nung yanglua lir. Iba airport yangluba nung sen crore 605 endok.
Tanü airport lapokba sentong nung Sikkim Governor Ganga Prasad, Sikkim Legislative Assembly Speaker KN Rai, Chief Minister Pawan Chamling, Union Minister for Civil Aviation & Commerce Suresh Prabhu, Union Minister of State for Development of North Easter Region [DoNER] Dr Jitendra Singh, aser Minister of State for Electronics & Information Technology SS Ahluwalia nungertem aden.
Tanü PM Modi-i Pakyong Greenfield Airport indang plaque sayatsüa airport lapoktsü.
Iba sentong nungsa Modi-i ‘100 Airports of India’ ta ser AAI-i adokba kaket ka sayatsü.
Union Minister for Commerce & Industries and Civil Aviation-i PM nem nüngo ka agütsü.
Pakyong nung aliba St Xavier’s School playground nung ayonga agiba sentong nung o jembidang, Narendra Modi-i ‘iba ya Sikkim nung alirtem aser linük atema tongtipang anogo ka lir’ ta ashi.
Pakyong airport lapokba ajanga nübortem ajangzüktsü aser iba ya Centre sorkar indang Udan Yojana den sendaktepa lir. Centre-i tayimtsü nung senzüba dalangba kümdaktsütsü alizüng yua lir. Pakyong airport ajanga Kolkata aser Guwahati den anogoshia sendakteptsü aser tanga tesemtem dena sendakteptsü sentong lir, ta Modi-isa metetdaktsü.
Tesüiba küm 4 tsüngda airport 35 tashi lapoktsüogo. Küm 67 tsüngda airport 65 dang yanglua liasü saka tesüiba küm pezü tsüngda airport 35 yanglutetogo. Iba airport ajanga Sikkim nung alirtem rongsenkettsüng tsütsü yaritsü aser lanurtem nem maongka agütsütsü, ta paisa ashi.
Sentong nung Sikkim Chief Minister Pawan Chamling-i o jembidang Sikkim nungertem tenüng nung Prime Minister dang pelaba metetdaktsü.
Union Minister for Commerce & Industries and Civil Aviation, Suresh Prabhu-ia ashiba agi iba airport ya Prime Minister-i Sikkim nem tenla agütsür.
Sikkim-i aviation history nung putu tasen ka tenzükogo aser iba ajanga connectivity, tourism & trade tajungba akümtsü.
2000 küm 11th Finance Commission-i Sikkim nung airstrip ka yanglutsü atema sen crore 50 lemzüktsü. State sorkari airport yanglutsü atema Pakyong shimtet aser ali bushitsü tenzük.
2006 küm UPA-1 sorkar kübok Union Cabinet indang Committee on Economic Affairs-i Pakyong nung greenfield airport ka yanglutsü mulunga agizük. 2007 nung Punj Lloyd Group nem airport yanglutsü atema contract lemzüktsü.