PM Modi-i Sonia aser Manmohan na jaok

New Delhi, November 27 (Agencies): Hokolbar nikongdang Ato kilonser Narendra Modi-i opposition tongti, Congress Party Tir Sonia Gandhi aser taoba mapang Ato kilonser, Manmohan Singh na süngo ajemtsü atema jaokogo, aser iba mapang nungji Modi-i Goods & Service Tax (GST) Bill ama onüktem süoka jembitsü südi.

Modi-i taonung 7:00 ako nung Congress lenirtem pa aliba Race Course Road kidangi jaokogo, ta osang ka ajanga ashi.

Tashi nung aliba sorkar aser Congress party na tekong merangtepba ajanga Goods and Services Tax (GST) Bill densema tongtibang bill aika magizükteti lir.

Yashi Brihostibar nü Union Finance Minister, Arun Jaitley-i, GST Bill agizüktettsü asoshi Ato kilonser Modi-i ajak den jembitsü melunga dang lir, ta metetdakja liasü.

Ano iba bill atema Jaitley-ia Congress lenir aika den jembiogo.

“Ato kilonser level tashi nunga onoki tarendakba kecha mali. Tesüiba mapangtem nunga yamaji maliasü, aser tanga yamaji masü. Pai ajak den jembitsü melunga lir,” ta yashi Jaitley-i ashi.